Honest nga tinun-an gipasi-dunggan

Gipasidunggan niadtong Huwebes sa buntag sa konseho sa Talisay ang usa ka estudyante sa San Roque Elementary School tungod sa pag-uli niini sa kwarta nga iyang nakit-an nga gipanag-iya ni Konsehal Shirley Belleza.

Si Bella Mardoquio, estudyante sa grade five sa maong tunghaan taga Sitio Salvador, Barangay Tanke ang gihatagan kagahapon og pasidungog sa siyudad.

Si Belleza sa pakighinabi sa Banat News mibutyag nga ang iyang kwarta nga mokabat og P10 mil nga iyang sweldo gibutang lang niya sa bulsa sa iyang jacket atol sa ilang pagpangampaniya diha sa Tanke.

Mihulbot siya og P100 diin iya kining gipalit og kendi ug gipanghatag sa mga bata nga nagtapok apan wala siya makabantay nga nahagbong diay ang uban niyang kwarta.

Nabantayan ni Belleza nga wala na ang iyang kwarta sa bulsa pagsaka niya sa entablado hinungdan nga mikanaog siya og balik para mangita og gitunol ni Mardoquio kinsa naghuwat niya sa ubos.

Matud ni Belleza nga gawas sa pasidungog sa konseho gihatagan usab ni Kongresista Eduardo Gullas og scholarship sa college sa University of the Visayas si Mardoquio.

Ang konsehal nanghinaot nga si Mardoquio mahimong sumbanan sa ubang mga batan-on nga magmatinod-anon.