Presidente sa Namtoda napusilan patay

Patay dihadiha ang usa ka Muslim nga presidente sa mga drayber og traysikol nga nagrota sa Maribago human kini pusila sa duha ka mga tawo sa merkado publiko sa Lapu-Lapu sa milabay’ng gabii.

Ang biktima mao si Hadji Ibrahim Dima-ampao Jr. lumad nga taga Sultan Naga de Maporo, Lanao del Norte ug presidente sa Night Agus Maribago Tricycle Operators and Drivers Association (NAMTODA) sa Lapu-Lapu.

Base sa imbestigasyon ni PO3 Frederick Eslit sa Homicide Section sa Lapu-Lapu nasayran nga samtang padulong na pauli ang biktima mga 11:20 sa milabay’ng gabii luwan sa iyang traysikol nga gimaneho sa duha ka mga tawo ang miatang kaniya sa merkado publiko sa Lapu-Lapu ug dayong pamusil ngadto kang Dima-ampao.

Gumikan sa nahiaguman nga samad pinusilan ni Dima-ampao sa iyang tangkugo, likod ug suwang agi sa kalibre .45 gidali kini pagdala sa Lapu-Lapu District Hospital apan gideklarar nga dead on arrival sa mga doktor.

Samtang ang duha ka tawo nga mipusil ni Dima-ampao yano ra kining misibat nga naglakaw lang sa maong dapit.

Sa dugang imbestigasyon ni PO3 Eslit, ang asawa ni Dima-ampao nga si Myrna mitug-an nga nagduda kini nga kauban ra sa iyang bana nga drayber og traysikol ang mihimo sa krimen.

Matud pa ni Myrna nga sa milabay’ng bulan sa Marso usa ka kauban niini nga drayber og traysikol nga usa usab ka Muslim ang gisagpa sa iyang bana gumikan kay sige lang og kapalta sa iyang pagtambong sa meeting sa mga drayber ug sukad niadto wala nay lain pang nakaaway ang iyang bana.

Matud pa ni Eslit nga posibleng panimalos ang motibo sa maong pagpusil ni Dima-ampao, apan hangtod ning pagbalita wala pa gibutyag ni Myrna ang ngalan sa maong drayber nga gidudahan niini nga maoy responsable gumikan kay padayon pa ang gihimong imbestigasyon sa kapolisan. Samtang si Myrna usab nanghinaot nga kahatagan og hustisya ang nahitabo sa iyang bana gumikan kay nagbilin kini og pito ka mga gagmay’ng anak ug 14-anyos pa ang kamaguwangan niining lalaki.