Amahan ug uyoan giluba, usa patay

Usa ang namatay ug lain usab ang grabeng naangol human mabiktima sa pagpanunggab sa batan-ong anak nilang lalaki sa pamilya sa managkalahing takna ug dapit sa lalawigan sa Sugbu.

Si SPO4 Teofilo Deguilmo sa Danao Police Station miila sa namatay nga si Anselmo Hermoso, hingkod ang panuigon, minyo nga taga Sitio Awihaw sa barangay Santa Rosa dakbayan sa Danao.

Nadunggaban sa buko-buko ug uban pang bahin sa iyang lawas si Hermoso nga maoy gituohan sa iyang kamatayon.

Matud pa ni Deguilmo nga mitahan ang 16-anyos nga suspetsado nga pag-umangkon sa biktima ngadto kanila ug gibalhog karon sa ilang detention cell.

Ang laing nadunggaban mao si Raul Fuentes, 43 anyos, minyo nga taga Poblacion, Langob, dakbayan sa LapuLapu.

Si PO3 Joseph Damasco sa homicide section miila sa suspetsado nga mao si Bryan Fuentes, 19 anyos, ulitawo ug anak sa biktima.

Dugang pa ni Damasco nga nag-away ang biktima ug ang manghod nga babaye niini ug iyaan sa suspetsado.

Gibadlong ni Bryan si Raul apan mao na hinuon kini ang giatubang ug gikulata sa iyang amahan.

Nakapunit og limbas si Bryan ug gidunggab ang buko-buko sa iyang amahan nga maoy nakaingon sa pagkaangol niini.