Mga kandidato sa M''daue pulos nangreklamo batok isig karibal

Mipadayag sa ilang mga reklamo sila si mayoralty candidate Amadeo Seno, Jr. ug ang kampo ni Mayoralty andidate Thadeo Jovito Jonkie Ouano sa dili makiangayong pamaagi sa mga kaatbang nilang kandidato nga ilang namatikdan nga may pagpamintaha.

Kini may labot sa pagpanganlat sa ilang mga campaign materials ni Mayoralty Candidate Thadeo Jovito "Jonkie" Ouano.

Samtang gihikawan usab si Acting Mayor Seno nga makuha''g connection sa kuryente aron unta mahayagan ang pulong-pulong nga pagahimoon sa Canduman Housing Settlement Project sa barangay Canduman sa miaging gabii.

Hinuon nahinayon gihapon ang maong pulong-pulong ni Seno dihang usa ka tindahan ang mitugot nga magpa-connect sa linya sa ilang kuryente.

Si Mandaue City Registrar Ferdinand Gujilde nga gikahinabi sa Banat News miingon nga tangtangon lamang ang mga campaign materials sa mga kandidato kun gipahimutang sa dili common poster area.

Giklaro niya nga ang ilang buhatan wala mopakatap og mga tawo nga gitahasan sa operation kanlat sanglit mga barangay tanod ug mga polis ang ilang gi-deputized niini.

Si Garry Lupecillo sa Jagobiao mitug-an usab sa Banat News nga ilang naabtan sa akto ang wala hiilhing pundok sa mga tawo nga nanganlat sa poster ni Jonkie apan dali kining mipahilayo nga nagsakay og motorsiklo.

Gawas sa pagpanganlat sa poster ug campaign materials may pundok usab sa wala hiilhing mga tawo nga mibabag kang Vice Mayoralty Candidate Carlo Fortuna sa pagsulod sa sitio Tambis sa Ibabao Estancia aron sa paghimamat sa mga lumolupyo.

Ang pagbabag kang Fortuna gihimo sa pundok sa mga wala hiilhing lalaki nga naghukas kinsa mipakgang sa iyang pagpanglamano.

Matud pa ni Fortuna nga wala niya makuha ang mga pangalan sa maong pundok sa mga tawo apan dako ang iyang pagtuo nga mga dumadapig usab kadto sa ilang kaatbang nga kandidato.

Ang kandidato sa pagka konsehal sa kampo ni Eduardo Jon Cortes nga si Jorge Judilla mitug-an usab sa Banat News sa nahitabong pagpanganlat sa mga poster o campaign materials sa mga kandidato.

Si Judilla miingon nga niadtong miaging adlaw sa barangay Pagsabungan maoy ilang naabtan ang wala hiilhing lalaki nga nanganlat og mga poster nga gipalit sa pribado nga koral.

Nagdali pagsakay sa nagpaabot nga sakyanan ang maong pundok kinsa wala makatubag sa iyang pagpangutana kon kinsa ang nagsugo sa pagpasiugda og kanlat sa poster ni Jonkie Ouano.