Travel advisories sa Australia gipakagamay lang sa kapolisan

Walay angayang ikabalaka ang mga turista, bakasyunista ug mga Sugbuanon kabahin sa gipagawas nga advisory sa nasud sa Australia dinhi sa rehiyon mahitungod sa pagpangatake sa mga terorista.

Si Police Regional Office 7 director, Chief Supt. Silverio Alarcio,Jr. mitug-an sa mga tigbalita kagahapon nga dunay hustong pwersa ug plano ang kapolisan alang sa seguridad ug labaw sa tanan wala sila makadawat og susamang hulga gikan sa ilang mga field units.

"We have not received any report from any source, as far as terrorist plans is concerned in Region 7... although every summer, the PNP is always coming out with a security plan to ensure the security of our visitors in the region being one of the tourist destinations," asoy pang Alarcio.

Matud pa niya ang maong advisory susama gihapon sa gipagawas sa maong nasud niadtong milabay''ng Disyembre ug Enero atol sa pagpahigayon sa 12th Asean Summit, nga dunay giingong mga teroristang nagplanong moatake atol sa panagtigum sa mga lider sa ASEAN.

Niadtong Disyembre, ang nasud sa Australia, Britanya, Canada ug US mipagawas og travel advisories sa ilang mga paisano dinhi sa nasud aron likayan ang pagbakasyon sa rehiyon tungod sa posibilidad nga dunay pag-atakeng mahitabo, apan ang maong impormasyon wala mahitabo.

Kini tungod sa grabeng preparasyon sa kapolisan ug militar nga mipakatap og kapin sa 10 mil ka mga sundalo ug mga polis sa palibot sa summit venue.