Bombero napusilan ni Kap kay nagmaoy

Usa ka sakop sa bombero nga nadestino sa dakbayan sa Talisay nga giingong hubog ug nagmaoy napusilan sa barangay kapitan sa San Isidro dakbayan sa Talisay niadtong Miyerkules sa gabii diha sa Corazon Village sa nahisgutang barangay. Si Fire Officer 3 Exus Campaña, 41, residente sa Sitio Ilang-ilang sa maong barangay nakaangkon og samad pinusilan sa walang paa agi sa bala nga milahos sa bitiis nga daling gidala sa Vicente Sotto Memorial Medical Center.

Si Kapitan Regino "Hinok" Sanchez wala pa magpakita sa mga polis human sa maong hitabo.

Si PO2 Harrison Quiñanola sa Talisay Police Station mipahigayon og imbestigasyon sa insidente mibutyag kagahapon sa Banat News nga si Campaña hubog ug paingon na unta nga mopauli apan mihapit kini diha sa nagtapok nga mga tawo nga nagduwa og bingo diha atubangan sa balay ni Sanchez.

Lakip nga nagduwa og bingo ang asawa ni Sanchez nga si Condrada ug sa walay igong rason gituwad ni Campaña ang lamesa nga gigamit sa mga nagduwa ug sa maong hitabo nasamad ang asawa sa kapitan nga posibleng naigo kini sa lamesa nga natuwad.

Miabot si Sanchez uban sa iyang mga tanod ug gipusasan si Campaña kinsa niadtong tungora nanghasi.

Matud ni Quiñanola nga si Campaña mipasangil ni Sanchez nga mipusil kaniya human siya niini pusasi.

Si Quiñanola nagkanayon usab kagahapon sa hapon nga balikon niya sa tambalanan si Campaña aron maestorya niya kini og tarong tungod kay dihang nahitabo ang insidente hubog kini ug dili niya matarong og estorya.

Hangtod sa oras ning pagbalita, si Sanchez ug ang iyang asawa wala makig-istorya sa mga polis.

Sa laing bahin, si Campaña gipa-blotter sa iyang asawa nga si Monica usa ka maestra sa usa sa pribadong tunghaan sa dakbayan diha sa kapolisan sa Barangay Poblacion niadtong Martes sa buntag tungod kay gisagpa siya niini.

Base sa imbestigasyon sa kapolisan nga hubog si Campaña ug gihagad niini si Monica ug ang ilang mga anak nga mouban kaniya nga motan-aw og basketball diha duol sa ilang balay.

Apan wala mokuyog si Monica ug ang ilang mga anak hinungdan nga nasuko si Campaña ug giingong nanagpa.

Si Quiñanola midungag nga si Monica mianha sa balay ni Sanchez ug nangayo kini og tabang sa kapitan kabahin sa iyang bana nga nagmaoy.