Si Rufino Dodong Mancio dihang nahinabi sa Banat News miingon nga niadtong milabay'ng semana usa ka kontraktor sa ilang lungsod ang mitug-an kaniya nga ipapatay siya sa maong kandidato pagka-bise mayor.
Matud pa ni Mancio nga mitug-an kaniya ang maong kontraktor nga niadtong milabay semana ang maong kandidato ug ang maong kontraktor nagkadungan sa pagtambong og kasal ug nakadungog mismo sa kandidato nga mimando sa usa ka hitman nga patyon na si Dodong.
Suma pa niini nga nabalaka ang maong kontraktor kun unsay mahitabo kaniya hinungdan nga gipahibalo siya sa impormasyon nga nakuha niini aron usab mag-amping sa paglihok-hilok niini labi na sa aktibong pagpangampanya sa iyang asawa.
Si Mancio mipadayag nga iya nang gipatun-an sa iyang mga abogado ang maong isyu aron sa pagsang-at og tukmang kaso ug kuhaon nga testigos ang maong kontraktor.
Gawas pa niini dili lang siya ang nakadawat sa maong hulga sa pagpatay apil na usab ang close-in bodyguard sa iyang asawa nga si SPO1 Juanito Yunting, kinsa gitinguha usab karon sa kampo sa maong kandidato nga ipalagpot sa laing lugar gumikan sa pasangil nga bias kaayo ngadto sa mayor.
Gani si SPO1 Yunting nakadawat usab og hulga pinaagi sa usa ka text niadtong milabay'ng semana nga kutob nalang sa petsa dos sa Abril gumikan sa pasangil nga bagsik kini nga pagka-police.