Barangay kapitan ug kandidato sa pagka-konsehal diriyot magsukmagay

Diriyot magsinumbagay ang kapitan sa Cogon-Pardo nga si Lyndon Fermo ug kanhi barangay kapitan sa maong dapit nga kandidato karon sa pagka-konsehal sa South District nga si Eugenio "Jun" Gabuya human magdumili si Fermo nga sila makasulod sa sports complex sa barangay kagahapon sa buntag.

Si Fermo mireklamo niini ngadto sa Pardo police station ug mipasangil nga gi-harass siya sa pundok sa Tribu-Guardo nga gipanguluhan ni Jonathan Guardo nga kandidato sa pagka-kongresista sa South District.

Si Fermo nga gihinabi sa mga tigbalita nagkanayon nga dunay gihimong feeding program ang Joy Children Foundation sa gibana-banang usa ka libong mga bata sa ilang barangay kagahapon dihang miabot ang pundok sa Tribu-Guardo.

Ang JCF daan nang mipasidaan kang Fermo nga di politikal ang ilang kalihukan maong gibabagan niya ang grupo nila ni Guardo nga di makasulod ug miesplikar nga mga bata ra ang tua sa sulod.

Apan gikatahong si Gabuya nasuko niini ug nahitabo ang mainiton nilang panaglalis ug diriyot nang magsukmagay apan napugngan kini sa mga kalmadong mga kaubanan.

Human sa insidente gisumbong ni Fermo sa kapolisan ang nahitabo. Samtang mibahad usab ang kampo ni Guardo nga mosang-at og kasong coercion ug grave abuse of authority si Fermo.

Nasayran nga si Gabuya maoy nipatukod sa maong sports complex dihang siya pa maoy kapitan sa maong barangay.

Matud pa sa grupo ni Guardo nga mao na kini ang ikaduhang higayon nga gi-harass sila atol sa ilang pagpangampanya, unang insidente dihang gibabagan sila og mga traffic enforcers sa Guadalupe ug gidid-an nga makalahos sa ilang motorkada tungod kay wala silay permit.