Bikini open, Miss Gay ug beauty pageants idili-CAIB

Dakpon sa mga kadagkuan sa Cebu City Anti Indecency Board (CCAIB)kadtong mga barangay nga mopahigayon og bikini open, fashion show, ug miss gay karong Semana Santa hangtod na sa bulan sa Mayo.

Kini maoy gipahibalo ni Dr. Rene Joseph Bullecer ang tsirman sa (CCAIB) aron usab maimplimentar ang City Ordinance 1408 nga nagdili sa maong mga pasundayag panahon sa Semana Santa ingon man sa bulan sa Mayo diin dili lang ang mga barangay adunay mga susamang kalihukan kun dili apil na niini ang mga sitio dinhi sa dakbayan nga adunay pista ipahigayon.

Matud pa ni Bullecer nga mopadala unya siya og sulat sa tanang barangay dinhi sa dakbayan apil na ang mga simbahan aron mapadangat sa publiko ang ilang warning nga dili gyud mopasundayag og bikini open, fashion show, ingon man miss gay atol sa Semana Santa kay ila gyud nga dakpon ug pasakaan og kaso.

Dugang niini nga ang kaparian dako'g matabang sa pag-awhag sa publiko labot sa maong isyu hinungdan nga iyang gipanghinaot nga ipadangat usab ang iyang sulat labot niini.

Suma niini nga kadtong madakpan nga mopahigayon og bikini open, fashion show ug miss gay makamulta kini'g 5 mil pesos ug pagkabilango sa duha ka bulan apil na niini ang mga organizer sa maong kalihukan.