Talisay landing ug uban pang selebrasyon ugma

Naukay kagahapon ug naglumba sa pagpanagan paingon diha sa baybayon ang mga bata sa dagat sa Larawan Beach sa Barangay Poblacion dakbayan sa Talisay tungod sa chopper sa Philippine Airforce nga mipaubos diha sa dagat sa gipahigayong bansay-bansay sa pagsaulog sa American Landing sa siyudad karong Lunes.

Nalingaw unta ang nahisgutang mga bata sa pagpangaligo apan nakalitan kini dihang mipaubos ang chopper ug mibawod ang dagat tungod sa kusog nga hangin.

Kagahapon mipahigayon og tibuok adlaw nga bansay-bansay ang grupo sa Naval Forces Central para sa nahisgutang kasaulogan.

Si Lieutenant Junior Grade Alex Garzom, Civil Military Operation Officer (CMO) sa Naval Forces Central mibutyag kagahapon sa Banat News nga ang kanhi task force nga gilangkuban sa Navy ship transport vessel, patrol gun boat ug duha ka diesel fast craft nga gigamit kaniadto sa re-enactment ang gamiton gihapon karon sa kasaulogan.

Sa milabay'ng tuig walay chopper nga gigamit para sa re-enactment apan niining tuiga adunay chopper nga gamiton para sa helicast.

Ang chopper maoy sakyan sa mga sakop sa Naval Special Operation Unit 5 para mopahigayon og mine clearing diha sa dagat una moduong ang nahisgutang mga sakyanan sa Navy kinsa ang grupo sa Marine Reservist maoy mosakay niini.

Si Garzo mibutyag nga ang head sa Naval Task Force 51, Capt. Armando Guzman, Amphibious Task Force Commander Rafael Marciano ug head sa Naval Reservist sa Eastern Visayas Capt. Flordilino Quiban ang nangulo sa mao nilang pagbansay-bansay.

Ang maong kasaulogan sugdan sa alas 7:00 sa buntag karong Lunes.