'Antingan' sa Carbon Market gidul-ita'g pusil-patay

Usa ka lalaki nga giingong "antingan" ang gipusil patay samtang nagduwa og dama diha sa eskina sa dalan F.Gonzales ug Lincoln sa barangay Ermita niadtong milabay'ng gabii.

Usa ka samad pinusilan sa luyong bahin sa ulo ang nahiaguman sa biktimang si Leonardo Bastida,32, kargador sa Carbon market ug lumad nga taga Oriental-Poblacion sa lungsod sa Consolacion.

Duha ka wala mailhing mga lalaki ang gitumbok nga mipusil sa biktima nga dali usab nanagan pasulod og balik sa Unit 3 sa Carbon Market.

Sa imbestigasyon sa Homicide Section ang biktima kasamtangang nakigduwa og dama kang Antonio Villacorta,28, salesman sa usa ka agricultural supplies store sa maong dapit dihang giduol sa mga suspek.

Usa sa mga mamumuno ang mipusil sa luyong bahin sa ulo sa biktima gamit ang wala matinong kalibre sa armas de fuego dayon nagdali nga miikyas.

Nakuha diha sa posesyon sa biktima ang iyang mga personal nga butang ug mga gidudahang mga anting-anting, samtang wala pa matino sa kapolisan kung unsay motibo sa pagpatay kaniya.

Apan usa sa mga sagad nga hinungdan sa mga kagubot diha sa maong lugar mao ang panag-ilog sa pwesto sa mga kargador nga mohakot ug mobantay sa mga paninda sa mga negosyante.