Nahitabo kini pasado alas 2 kagahapon sa kaadlawon sa Sitio Lib-og, Samosa, Tabogon Cebu.
Si Insp. Wilfredo Giducos, hepe sa Tabogon Police Station nga nahinabi sa Banat News miila sa biktima nga si Neolito Brignas, 31, minyo, usa ka mag-uuma ug residente sa nahisgutang dapit.
Siya namatay dihadiha human makaangkon og samad pinusilan sa ulo agi sa wala masayring kalibre sa armas nga maoy gigamit sa wala mailhing gikatahapan.
Ang pagpusil patay ni Brignas naatol gyud sa paghatag og speech ni Konsehal Tessie Lichedo sa Tabogon nga magpapili pagka-mayor sa Tabogon karong Mayo 14 ubos sa partido sa One Cebu Party.
Si Lichedo usa sa pinasidunggang dinapit sa coronation night sa mga kandidata sa nahisgutang lugar nga nagsaulog sa ilang kapistahan.
Ang pagpusil sa biktima gidungan sa fireworks display aron dili mailhan ang buto sa armas.
Apan nabantayan na lang kini nga nahagsa na ang biktima 20 metros gikan sa nag-parking nga sakyanan ni Lichedo ug 50 metros ang gilay-on sa stage nga gibarugan ni Lichedo sa iyang pagpamulong atubangan sa mga nisaksi sa koronasyon.
Nagkanayon si Lichedo nga dili iyang tawo ang gipusil kun dili giatol lang gyud nga siya namulong ug walay kalambigitan ang politika.