‘Halo-halo’ nga politika sa siksto

Halo-halo nga politika ang mapaabot sa mga botante sa siksto distrito tungod sa panagsagol sa mga kandidato nga gikan sa managkontra nga pamilya.

Kini nasayran human si Consolacion Mayor Avelino Gungob, iyang runningmate pagka-bise mayor Konsehal Ember Alinsug, mga kandidato pagka-konsehal ug 19 ka kapitan sa 21 ka barangay sa Consolacion miduaw sa Norkis clubhouse sa Mandaue ug personal nga mipadayag sa ilang pagbiya sa kampo ni Kongresista Nerissa Soon-Ruiz ug mosuporta ngadto kang Bokal Luigi Quisumbing isip kandidato pagka-kongresista sa ika-unom nga distrito.

Si Gungob mipahibalo nga anaa ubos sa iyang line-up pagka-konsehal si Alfie Ouano, anak ni Mayor Thadeo Ouano ug igsuon ni Jonkie Ouano nga kandidato pagka-mayor sa Mandaue. Si Alfie magpasubli pagka-konsehal sa Consolacion.

Namahayag usab si Gungob nga bisan siya ang district chairman sa One Cebu Party ni Gobernador Gwendolyn Garcia nga nagsuporta sa mga Ouano, adto gyud siya ug ang mga kapitan sa Consolacion mosuporta ni Quisumbing.

"Nananghid na man ko niya (Garcia) nga siya (Quisumbing) akong suportaran. Wa man pud siyay mahimo," si Gungob nagkanayon.

Usa sa nakitang rason ni Gungob nga mosuporta siya kang Quisumbing human gipamugos sa kampo ni Soon-Ruiz nga mahimong runningmate ni Gungob si Leo Go nga dili niya kaalyado.

"Sukad masukad wa man gyud na siya (Soon-Ruiz) modirekta nako og hatag og proyekto kay iya man i-direkta sa barangay," nagkanayon si Gungob. Apan iyang giklaro nga hilabihan kagagmay sa mga proyekto ang nahatag ni Soon-Ruiz sama sa karsada nga 100 metros ang gitas-on lamang.

Si Gungob nagkanayon usab nga iyang nakita nga may kausaban sa industriyalisasyon sa Consolacion sa higayon nga matudlo si Quisumbing nga kongresista sa ika-unom nga distrito.

Sa iyang bahin, si Quisumbing mihangop sa maong kalambuan ug nagkanayon nga dako ang ikatampo ang grupo ni Gungob sa tinguha niini pagbalanse sa industriyalismo sa ika-unom nga distrito sa Sugbu.

Matud ni Quisumbing nga suod sila ni Alfie sa hunta probinsiyal tungod kay kun adunay mga "out-of-town" session silang mga batan-ong bokal, uban ni Bokal Tata Corominas, ang magkuyog-kuyog.

Sumala pa niya nga gi-uwang lamang og duha ka lingkoranan ang gilay-on nila ni Alfie sa session room sa Kapitolyo.

Si Quisumbing gisuportahan usab sa Bangon Mandaue ni Konsehal Jonas Cortes, Cordova Bise Mayor Danilo Sinugbuhan nga modagan pagka-mayor sa Cordova atbang sa ig-agaw niining si Atty. Adelino Sitoy nga amahan sa incumbent Mayor Arleigh Sitoy.

Gipaabot nga sa dili pa ang katapusang adlaw pagsang-at sa sertipiko de kandidatura sa Marso 29, mopadayag usab sa iyang pag-endosar ni Quisumbing si LapuLapu City Mayor Arturo Radaza.

Sa miaging semana, si kanhi Gobernador Lito Osmeña ug Mayor Tomas Osmeña mipadayag usab sa ilang suporta ngadto kang Quisumbing ug sa kampo ni Cortes.