'Kawatan' gipusil sa ulo patay

Napalgan sayo sa buntag nga nagbuy-od daplin sa dalan ang usa ka hamtong lalaki nga may samad pinusilan sa tuong bahin sa ulo sa Luka gibanabanang 12 ka kilometro gikan sa Poblacion Balamban, Cebu.

Si Lucia Barnayha, residente sa Luka maoy nakadiskubre sa nagbuy-od nga lawas ni Wilfredo Panilagan, 33, minyo ug nagpuyo sa nahisgutang dapit.

Segun sa report sa kapolisan nga midangat sa Cebu Provincial Police Office si Barnayha nianang pasado alas 6 niadtong Lunes sa buntag iyang naagian ang biktima nga nagkadugo ug may samad pinusilan sa ulo.

Sa imbestigasyon sa kapolisan nasayran ang biktima gikan nagtumod og mga utanon sa Mangabon ning dakbayan sa Sugbu niadtong adlaw'ng Domingo.

Sa iyang pagpauli paingon sa iyang pinuy-anan agi sa kakahuyan pag-abot sa may Udlom Cabasyangan habig sa Balamban kalit siyang gipusil sa wala mailhing tawo.

Si PO2 Cesar Climaco nga nahinabi sa Banat News niingon nga dunay mga tabi-tabi nga ilang nadunggan gikan mismo sa kapitan sa Luka nga gidudahan ang biktima nga manghilabot og mga hayopan.

Matud niya nga blangko pa gihapon sila kung kinsa ang responsable sa krimen.