Duha patay sa aksidente, 2 angol

Duha ka tawo ang patay sa aksidente sa karsada niadtong Sabado diha sa duha ka lungsod sa habagatang bahin sa Sugbo. Unang insidente nahitabo diha sa Sitio Lukon, Barangay Poblacion lungsod sa Alegria kinsa ang biktima giila sa mga polis nga si Alberto Lastimoso, 50-anyos, usa ka garbage collector sa maong lugar.

Ang suspetsado mao si Isidor Barina 24, kinsa nagmaneho sa multicab nga nagtangag sa plakang YAL-128 natingkagol karon diha sa Alegria police detention cell.

Si PO2 Leopoldo Tagalog polis sa Alegria mibutyag kagahapon sa Banat News nga si Lastimoso nangolekta og basura diha sa national highway sa lugar dihang aksidente kining nabanggaan ni Barina.

Maayong pagkabunal sa ulo ni Lastimoso diha sa karsada ug dali kining gidala diha sa Reinhard West General Hospital apan gideklaran kini sa doktor nga patay na nga naabot sa tambalanan.

Si Barina nakaangkon usab og mga pangos sa iyang nawong ug lawas tungod kay natuwad diha sa babayon ang iyang gimanehong multicab human mabanggai ng biktima.

Ikaduhang insidente nahitabo diha sa Sitio Catadman, barangay Borbon, lungsod sa Oslob diin ang biktima mao si Genera Benghit 55-anyos residente sa maong lugar kinsa nakaangkon og grabeng kadaot sa lawas human aksidenteng nabanggaan sa Mitsubishi Pajero nga nagtangag sa plakang YBW-785 nga gimaneho ni Peter Chuang 36, taga Bantayan, Dumaguete City.

Si Benghit gideklarar usab sa doktor nga patay na nga naabot diha sa Oslob District Hospital.

Si PO2 Nilson Saquibal sa pakighinabi usab niini sa Banat News kagahapon nagkanayon nga boluntaryong mitahan sa iyang kaugalingon si Chuang diha sa ilang buhatan ug mitaho sa maong insidente.

Matud ni Saquibal nga nagbiyahe gikan sa amihanang bahin sa lugar paingon sa habagatan si Chuang apan tungod sa kadangog sa karsada nga resulta sa uwan na slide ang likid sa sakyanan niini ug miliko paatubang ni Benghit kinsa naglakaw niadtong tungora.

Si Saquibal midungag nga ang mga paryente ni Benghit wala moduso og reklamo sanglit nakig-alegro kini ni Chuang kinsa misaad nga maoy moabaga sa tanang galastohan sa pagpahimutang sa patay'ng lawas sa biktima.

Sa laing bahin, duha ka tawo ang naangol dihang ang gisakyan nilang multicab aksidenteng nabanggaan sa Ceres bus sa milabay'ng adlaw diha sa Barangay Pulang Bato lungsod sa Bogo.

Ang mga biktima giila sa mga polis nga si John-John Fernan 17 ug Michael Gulani 37 pulos residente sa Barangay Gairan sa maong lungsod kinsa daling gidala diha sa Cevero Verallo Memorial District Hospital.