Di na pabalikon ang Kap sa Manipis

Ang kagamhanan sa Talisay posibleng dili motugot nga mobalik sa pwesto si Ramil Manayon, kapitan sa Barangay Manipis, tungod sa giatubang niining kaso.

Kahinumduman nga niining bag-o lang, si Loreto Silva gipapanumpa ni Mayor Socrates Fernandez nga maoy mopili ni Manayon isip kapitan sa nahisgutang barangay.

Si Osmundo Manreal, presidente sa Association of Barangay Captain (ABC) mibutyag kagahapon sa Banat News nga nakahibawo na ang Mayor kabahin sa plano ni Manayon apan ila una kining susihon kung pwede ba kining molingkod pag-usab sa pwesto ilabina nga nakapanumpa na si Silva.

Gibutyag ni Manreal nga "on leave" si Manayon dihang wala kini mopakita.

Gitataw ni Manreal nga kung malutsan na si Manayon og warrant of arrest sa iyang kaso posibleng dili na gyud kini tugotan nga makabalik sa iyang pwesto apan samtang wala pa kini malutsi og warrant angayan mangita og pamaagi niini ang kapitan.

Kahinumduman nga si Manayon ang suspetsado sa pagpanglugos sa iyang 15-anyos nga ig-agaw ug ang kaso naduso na sa korte.

Si Manayon sa iyang bahin mibutyag kagahapon sa Banat News nga miduso siya og lima ka buwan nga leave nga nagsugod niadtong Pebrero 15 ug mahuman unta kini karong Hunyo 17.

Matud ni Manayon nga aduna siya'y personal nga kalihukan hinungdan nga mi-leave siya apan nahuman na ang iyang mga personal nga lakaw mao nga gipamubo na lang niya ang iyang leave.

Apan wala mohatag og pamahayag si Manayon kabahin sa pagpapanumpa ni Fernandez ni Silva.

Giangkon sa Kapitan nga apektado siya sa kaso diin usa usab kini sa rason sa iyang pag-leave.

Si Manayon misumiti og "letter of resumption" ngadto ni Fernandez niadtong Martes diin moepekto unta kini kagahapon.

Kagahapon sa buntag, si Manayon mitambong sa gipahigayong tapok-tapok sa mga lider sa unang distrito ubos ni Kongresista Eduardo Gullas diha sa White Gold House Restaurant.