Fishport sa Talisay gilaumang mahuman sulod sa usa ka tuig

Proyekto sa dakbayan sa Talisay nga fish port diha sa Barangay Tanke gilauman nga mahuman kini sulod sa usa ka tuig ug posibleng mapahimuslan dayon kini sa mga Talisaynon nga mga tindera og isda kinsa gipalayas gikan sa merkado sa dakbayan sa Sugbu.

Si Talisay City Engineer Audie Bacasmas mibutyag kagahapon sa buntag sa Banat News nga gisugdan na sa Department of Public Works and Highway (DPWH) ang riprapping sa fish port niadtong Disyembre sa milabay'ng tuig ug gi-mobilized na usab sa Cebu Port Authority ang causeway niini.

Matud ni Bacasmas nga gitrabaho usab nila karon ang charging sa pundo sa nahisgutang proyekto.

Kahinumduman nga mokabat sa P50 milyones ang budget nga igahin sa proyekto kinsa si Kongresista Eduardo Gullas ang miayuda para makakuha og pundo niini.

Si Bacasmas nagkanayon nga ang program of works sa proyekto nakompleto niadtong tuig 2005 ug kung kompleto na ang pundo niini gilauman nga mahuman kini sulod sa usa ka tuig.

Ang nahisgutang fish port butangan usab kini og kadunggoan sa mga dagkong panagatan nga naggikan sa nagkalain-laing lugar nga motumod sa ilang mga isda.

Kahinumduman usab nga ang mga opisyal sa dakbayan naglaom nga madugangan ang abot sa siyudad kun masugdan na ang operasyon sa maong proyekto.