Ang biktima mao si James Ryan Cabañero, 22, residente sa naasoy'ng lugar kinsa nakaangkon og usa ka samad pinusilan sa tuo niyang tiil ug daling gidala sa Talisay District Hospital.
Ang suspetsado giila sa mga polis nga si Wilbert Cabajar, 27, taga Sitio Bahadas, Tabunok.
Si Cabajar kinsa usab adunay kasong frustrated murder nga nasang-at diha sa sala ni Regional Trial Court (RTC) Judge Sylvia Paderanga sa branch 16 nasakmitan og usa ka .38 rebolber ug tulo ka buhing bala.
Kagahapon giandam na sa kapolisan sa siyudad ang mga dokumento alang sa kasong illegal possession of firearms with ammunition ug kalapasan sa Comelec gun ban batok ni Cabajar.
Si Cabajar sa pakighinabi niini sa Banat News kagahapon sa buntag miangkon nga usa siya ka sakop sa nahisgutang fraternity ug iyang gipusil si Cabañero tungod kay dihang iya kining gihangyo nga mosakay sa iyang traysikad wala kini mosugot ug mibuhi kini og dili maayong pulong hinungdan nga iya kining gibalik dayon gipusil.
Ang kapolisan kinsa nagpahigayon og 'roving' diha sa Sityo Mananga,Tabunok giduol sa usa ka residente sa lugar ug nagpahibalo nga dunay usa ka tawo nga iyang nakita nga nagdala og pusil.
Daling miresponde ang mga polis sa maong taho ug nasuta nga ang gitumbok nga suspetsado si Cabajar kinsa adunay warrant of arrest nga giluwatan ni Paderanga kabahin sa kaso niining frustrated murder.