Pagpangawat og kable sa Talisay gikabalak-an na sa konseho

Tsirman sa komitiba sa kahapsay ug kalinaw sa Talisay Bise Mayor Aberdovey Belleza mipadangat kagahapon og memorandum ni Police Superintendent Romeo Perigo, hepe sa kapolisan sa dakbayan kabahin sa nahitabong kinawatay sa mga kable sa poste sa suga diha sa South Coastal Road diin dul-an sa P500 mil ang danyos sa maong insidente.

Si Belleza sa iyang memorandum nagkanayon nga ang dakbayan mogasto og dul-an sa P500 mil para mahulipan ang mga kable ug uban pang mga butang nga gikawat diha sa nahisgutang kalsada hinungdan nga iyang giawhag si Perigo nga mopahigayon og higpit nga imbestigasyon kabahin sa maong insidente ug magbutang og mga polis nga magbantay diha sa lugar.

Kahinumduman nga adunay mga residente diha duol sa South Coastal Road habig sa Talisay ang mireklamo tungod kay ang mga poste diha sa karsada wala na magsiga ang suga kay gikawat ang mga kable niini ug nakahatag kini og peligro sa mga motorista.

Niining bag-o lang, ang mga residente diha sa Barangay Lawaan mireklamo ngadto sa buhatan sa Globelines tungod kay nawagtangan og signal ang ilang mga telepono apan nasuta nga gikawat ang kable sa ilang mga linya hinungdan nga nawagtangan sila og mga signal.

Hangtud karon ang maong insidente sa kawat wala pa gyud masulbad.

Ang mga suspetsado walay kahadlok nga mosaka sa mga poste sa telepono ug kuryente ug mamutol sa mga kable.