Graduation fee idili

Giawhag ang Department of Education nga monitoron ang tanang mga publikong tunghaan ilabi na dinhi sa dakbayan sa Sugbu aron sigurado nga mapatuman ang simple nga graduation sa mga tinun-an sa elementarya, sekundarya ug kolehiyo nga walay dagkung mga amutan nga pangayoon sa mga ginikanan.

Si Konsehal Edgardo Labella mopasar og resolusyon aron magpahinumdum sa direktiba sa DepEd No. 8, serye 2005 nga nagmando sa mga publikong tunghaan nga dili mangolekta og bisan unsang walay basehanan nga graduation fee o bisan unsa nga amutan.

Kini tungod kay ang nahisgutang direktiba nagtataw nga walay non-academic project ang mahimong makolekta ngadto sa usa ka tinun-an bisan sa yearbook tungod kay boluntaryo ra ang maong matang sa amutan.

Gipahinumduman usab niining maong direktiba ang mga magtutudlo og prinsipal nga dili mahimong mag-apil apil sa pagpangolekta sa maong mga boluntaryo nga amutan sa graduation nga dumalahon lang sa Parents Teachers Association (PTA).

Gipahibalo usab ni Labella nga dunay ordinansa ang dakbayan ang C.O. No. 1813 nga nagdili sa mga magtutudlo, prinsipal ug supervisor nga maka-solicit og mga donasyon ug amutan gikan sa mga tinun-an ug ginikanan niini.

Tumong ug tuyo sa konsehal nga mapatuman ang simple nga graduation sa bakasyon karong bulana nunot usab sa kalisud sa panahon nga nasinati karon sa kinabag-an sa mga molupyo dinhi sa dakbayan.