Akrho gipatay sa silingang Tau

Patay ang usa ka sakop sa Alpha Kappa Rho human kini pusila sa giingong sakop sa Tau Gamma Phi nga iyang silingan diha sa Kimaw Paray Compound sa Kasambagan ning dakbayan kagahapon sa kaadlawon.

Ang gipusil patay giilang si Carlos Colina,alyas Jingkoy,32, minyo ug residente sa maong dapit nga giingong miyembro sa Akhro samtang ang gitumbok nga mipatay kaniya mao ang silingan niining si Dexter Romeo,25, sakop usab sa karibal nga grupo.

Base sa imbestigasyon sa grupo ni SPO2 Rey Cuyos sa Homicide Section ang biktima nakit-ang nagsakay sa iyang bisekleta padulong og uli sa ilang balay.

Dihang naagi kini sa usa ka bakanteng parte dapit sa maong compound gikasugat niini ang suspek. Sumala pa sa kapolisan dunay nakakita nga naglalis ang duha niadtong tungura.

Dangtan pila ka gutlo kalit nga mipaka ang usa ka buto sa armas diha sa dapit diin mag-abot ang duha ug sa pagsusi sa mga tawo si Colina nakulob na sa yuta tupad sa iyang bisekleta.

Samtang si Romeo wala na diha igkita sa mga residente. Si Colina dunay usa ka samad pinusilan diha sa iyang wala bahin sa ulo nga gituohang milapos ang bala diha sa iyang hubon.

Gisusi pa karon sa kapolisan kung unsay motibo sa pagpatay kun personal ba nga panagdumot, apan usa sa ilang gidudahan mao ang panagribal sa maong duha ka fraternity nga nagsugod pipila na ka mga tuig ang nakalabay diin mikalas na og daghang kinabuhi sa ilang mga miyembro lakip na usab mga inosenteng walay labot nga napagan.