Innova ug CITOM patrolcar nagbangga

Lain na usab nga patrolcar sa Cebu City Police Office ang nadisgrasya diha sa South Reclamation Project nga nahitabo niadtong milabay'ng hapon apan ang gikabangga niini patrolcar usab sa CITOM.

Ang nalambigit nga mga sakyanan mao ang Toyota Innova Patrol Car nga may plakang SHN-918 ug gidestino sa buhatan sa Criminal Investigation and Intelligence branch.

Samtang ang gikabangga niini mao ang Suzuki Whalf Door #28 sa CITOM, ang duha ka mga sakyanan pulos gipanag-iya sa dakbayan sa Sugbu.

Ang Innova gimaneho sa sibilyan nga drayber sa city hall nga si Rogelio Castillo,57, nga taga Pit-os samtang ang nagmaneho sa sakyanan sa CITOM mao ang traffic enforcer nga si Elvira Nonong Ortega,41, taga A.Lopez, Labangon.

Sa imbestigasyon ni SPO1 Dionisio Almaden Galo, gikatahong parehong nag-okupar ang duha sa third lane nga nag-atubang sa south diin parehong nagpreparar sa pag-U-turn.

Ang sakyanan sa CITOM gikatahong nag-una sa Innova apan sa pag- U-turn niini ug sa Innova nga mi-U-turn usab nabangga ang isig ka kilid sa mga sakyanan.

Wala hinuoy nasakitan sa mga luwan sa maong mga sakyanan gawas lang sa kadaut nga nahiaguman sa mga patrolcar.

Base sa pagsusi sa dapit giingong nasipyat si Ortega sa pagmaniobra paglubag sa manibela ug maoy miigo sa Innova diha sa ikaduhang lane nga nag-okupar human maka-U-turn.

Usa ka semana na ang nakalabay, duha ka mga polis sa Mobile Patrol Group ang nadaro sa usa ka prime mover diha sa access road sa Mambaling padulong sa SRP.

Ang ilang sakyanan nga Toyota Innova napiyapi sa kilid ug nalandig sa tambalanan ang duha.

Niadtong bulan sa Enero, laing patrolcar nga Innova ang nadisgrasya human diha sa dalan Osmeña Blvd. padulong sa Provincial Capitol tungod sa duha ka batan-ong nagmaneho og motor nga walay mga lisensya nga kalit lang milusot sa dalan samtang nitabok ang nirespondeng Innova Patrol Car nga gimaneho ni Inspector Rex Campus.

Tungod sa mga nangaging disgrasya sa Innova, gimando ni Mayor Tomas Osmeña nga sibilyan na nga mga drayber ang pamanehuon sa patrolcars.