Bodyguard ni Gwen gitulis, suspek 'sikop

Arestado ang usa ka gipasanginlang tulisan human kini ug iyang kauban mitulis sa usa ka policewoman nga bodyguard ni Gobernador Gwendolyn Garcia kagahapon sa buntag.

Ang pagpanulis nahitabo diha sa atbang sa usa ka dakong department store sa dalan J.Luna sa North Reclamation Area samtang si PO2 Vilma Degamo kasamtangang nagpaabot og masakyang taxi.

Si Degamo sakop sa Cebu Provincial Police Office ug gidestino diha sa Office of the Provincial Governor.

Giila ni SPO1 Julius Ompad, imbestigador sa Waterfront Police Station ang suspek mao si Ronilo Bastatas,22, taga sitio Tabay, Mabolo ning dakbayan, samtang gipangita pa ang kauban niining giila lang niyang si Negro.

Sumala pang Ompad, ang pagsinggit ni Degamo ug pakitabang ug pagpahibalong usa siya ka polis maoy nakapawala sa kursonada sa mga suspek sanglit nag-iyahay sila og dagan ug gibilin nalang ang bag.

"Nagpaabot ni siya og masakyan padulong sa Ayala, unya giduol aning mga suspek, gilayog ni siya(Degamo) gitiunan og kutsilyo unya katong usa maoy mikuha sa iyang bag, naninguha intawon ning polis nisiyagit nga polis siya nagpatabang sa mga tawo, nakadungog siguro ning mga suspek nga polis diay ilang gitulis gibuhian ang bag sa dalan dayong nanagan," asoy pang Ompad.

Si Degamo sa pakighinabi sa Banat News nagkanayon nga gigukod pa niya og kapin 200 ka metros hangtud sa sitio Tabay ang mga suspek una pa siya makasakay og motorsiklong iyang gihangyo ang lalaking drayber siya pasakyon aron gukdon ang mga tulisan.

Dihang naabtan ang duha iya kining gisinggitan aron pahunongon dungan usab sa pagpangayo'g tabang sa mga tawo nga siya polis ug gitulis sa duha.

Pagkadungog sa mga suspek nga polis ang ilang gibiktima daling gibiyaan sa duha ang bag diha sa dalan ug nanagan.

Dali dayong gipunit ni Degamo ang iyang bag nga maoy gisudlan sa iyang 9 mm pistola nga may buhing mga bala, cellphone nga nagkantidad og P3 mil, pitakang may sulod nga P5 mil, nagkadaiyang ID ug mga make-up kits.

"Nagtuo siguro silang duna pa koy laing armas pero wala baya kay naa man sa akong handbag nga ilang gikuha, ilang gibiyaan unya akong gipunit ug gikasa akong armas unya amo nasang gilipot sa pikas," asoy pang Degamo.

Tuod man, subling nasigpatan ni Degamo diha sa sitio Crossing sa barangay Carreta ang duha diin ang usa naghukas na sa sinina nga yellow nga gibugkos sa iyang kamot apan nailhan niya ang duha.

Daling gipangtiunan ni Degamo ang duha ug gipanggunitan apan mikaratel og dagan ang usa hinungdan nga mipabuto siya makaduha ka higayon samtang gibukbok usab sa mga tawo si Bastatas.

Matud pa niya gumikan sa kawad-on ug wala nay ikabayad sa abangan sa balay maong nahimo niya ang maong salaod.

Matud pa niya bag-uhay lang siyang naundang sa trabaho sa pabrika sa plastik diha sa ilang lugar ug kasamtangan karong namantay og mga sakyanang giparking diha sa mga establisamento duol sa maong department store diin nila tulisa si Degamo.