Mga dinakpan bawal sugo-suguon — Valmoria

Dili gyud puwede nga pagawason ang usa ka piniriso sa usa ka hepe sa polis sulod sa selda gawas lang kung dunay order gikan sa korte.

Atol sa press conference kagahapon giklaro ni Sr Supt Carmelo Valmoria, hepe sa Cebu Provincial Police Office (CPPO) nunot sa gihimo ni Sr Insp Crisanto Duque nga gipasanginlang mipagawas sa duha ka pinirisong babaye didto sa Argao Police Station kay nagpahilot sa iyang tibuok kalawasan ug gipaapil pagpahilot ang kinatawo niini.

Usa sa duha ka piniriso nga maoy namasangil ni Duque nagpabilin sa detention cell sa Argao ug nagpaabot nga ibalhin sa Cebu Provincial Detention and Rehabilitation Center (CPDRC) samtang nagpadayon ang imbestigasyon.

Matud ni Valmoria bisan lalaki pa ang piniriso dili mahimong suguon sa usa ka polis sa ilang personal nga katuyoan ug usa kini ka violation.

Apan sa kaso ni Duque usa ka isolated case lang ug iyang gitug-an nga ikaduha kining nahitabo nga ang hepe iyang giparelibohan.

"Bisan priso kabalyero dili puwede nga sugu-suguon nila imo hinuon gitagaan ug higayon nga makalayas sila priso is priso" dugang pang Valmoria.

Matud ni Valmoria nga iyang balikon ug bisitahan ang police station sa Argao aron masayran ang problema sa mga polis.

Usa sa susihon ni Valmoria ang abuso sa mga polis nga magsige ug panugo'g piniriso nga kabalyero.

Giangkon hinuon ni Valmoria nga dunay pipila ka police station sa kalungsoran ang walay prisohan sa mga babaye apan iyang pangitaan ug paagi ang maong problema.