3 ka sakop sa frat namusil

Tulo ka gituohang mga sakop sa fraternity nagpataka og pamusil sa managkalahing takna ug dapit sa Looc, Mandaue ug usa ang namatay ug duha ang grabeng naangol.

Si PO2 Dante Wenceslao Presinto 5 sa Opao Police Station miila sa namatay nga mao si Cesar Gamorot, 20, ulitawo ug ang grabeng naangol nga kuyog niini mao si Joffel Degamo, 22, ulitawo nga iyang silingan sa sitio Bohol-Bohol, Looc sa maong dakbayan.

Dugang naangol nga giila ni PO2 Wenceslao mao si Tito Boromeo, 25, ulitawo nga taga Highway, Ibabao-Estancia sa mao gihapong dakbayan.

Si PO2 Wenceslao miingon nga si Boromeo kinsa gidala sa Perpetual Soccour Hospital gipusil sa naglakaw nga tulo ka wala mailhing lalaki nga mga batan-on alas 10 pasado ang takna sa gabii sa dalan San Antonio, Looc, Mandaue.

Nakabaton kini og samad pinusilan sa tuong bahin sa iyang tiyan nga milapos ngadto sa luyo apan sumala sa mga doktor nga nag-atiman nga may suwerte pa kay wala nabuslot ang sulod sa iyang ginhawaan.

Ang laing pagpamusil nga nahitabo sa alas 12 pasado ang takna sa miaging tungang gabii sa dalan Juan M. Ceniza sa mao gihapong lugar ug ang biktima mao sila si Gamorot ug Degamo.

Si Gamorot nakabaton og samad pinusilan sa dughan ug gideklarar sa mga doktor sa Mandaue City Hospital nga dead on arrival (DOA) ug samad pinusilan usab sa tangkugo ang naangkon ni Degamo kinsa padayon pa karon nga giatiman sa mga doktor sa maong tambalanan.

Matud pa ni Gamorot nga human sa pagpamusil sa duha ka mga biktima ang tulo ka suspetsado nga nagsakay og motorsiklo ang namusil pa sa unahan sa maong lugar nga naglakip na sa usa ka tigulang nga naglingkod sa traysikol ug suwerte nga dali nga nakalukso ug nakahapa.

Sa PO2 Wenceslao miingon nga maoy ilang pagtuo nga may kalambigitan ang panag-rival sa fraternity sa maong pagpamusil sanglit sa maong dapit daghan man ang mga batan-ong sakop sa Alpha Kappa Rho ug Tau Gamma Phi.