Si PO3 Rogelio Castañeda, kanhi sakop sa San Nicolas Police Station niadto una pa mabalhin sa Service Security Group sa CCPO gitangtang sa serbisyo sugod karong adlawa tungod sa nakitang "gross incompetence", ang kamandoan pinetsahan niadto pang Pebrero 19, 2007.
Ang pagtaktak subay sa mando sa RIAS-7 nga dunay pagtugot ni PRO7 director Silverio Alarcio, Jr. ug pinirmahan ni Sr.Supt. Drusillo Bolodo ang chief of staff sa PRO7.
Si Castañeda maoy aksidenteng nakaigo kang SPO4 Grace Retuya, sakop sa Theft and Robbery Section kinsa naglingkod sulod sa Administration Branch sa CCPO niadtong Pebrero 17, 2006 sa hapon dihang naigo sa aksidenteng pagbuto sa armas nga kalibre .45 sa maong polis.
Gibana-banang tulo ngadto sa lima ka metros ang gilay-on ni Castañeda diha sa gihimutangan ni Retuya, matud pang Castañeda nga iyang gi-unload ang iyang armas niadtong tungura dihang mibuto kini.
Si Retuya nakapangayo pa og tabang ug gidala kini ni Castañeda sa Perpetual Soccuor Hospital apan pila ka gutlo ang milabay nakabsan kini sa kinabuhi.
Si Castañeda gipasakaan og kasong reckless imprudence resulting to homicide sa Homicide Section diha sa sala ni Judge Francisco Sevilla,Jr. diin siya nakapiyansa og P20 mil.
Si kanhi CCPO director Melvin Gayotin mimando kang Castañeda nga ibutang sa SSG samtang nagdagan pa ang kaso.
Matud pa sa bag-ong hepe sa CCPO nga si Sr.Supt. Patrocinio Comendador ang kamandoan sa pag-dismiss kang Castañeda "executory" na kun ipatuman dayon.
Apan giklaro niya nga dili pa kini pinal nga desisyon sanglit mahimo pang tubagon pinaagi sa petisyon ni Castañeda ang maong silot sulod sa napulo ka adlaw.
Gisuwayan sa Banat News og kuha ang habig ni Castañeda sa iyang cellphone apan pakyas ang maong tinguha.