13 ka balay naugdaw sa sunog

Laing 13 ka balay ang nangaugdaw human masunog ang pinuy-anan sa mga vendors diha sa eskina sa dalan D.Jakosalem ug M.C.Briones sa barangay Sto.Niño niadtong milabay'ng gabii, kini maoy ikaduhang insidente sa sunog nga miigo ning bulana.

Ang kabomberuhan nakadawat sa alarma alas 8:50 sa gabii ug nakontrolar kini dayon sulod sa walo ka minutos. Higpit nga napawong ang kalayo pagka-alas 11:15 na sa gabii.

Wala hinuoy nareport nga nasakitan sa maong insidente apan midanyos kini og P180 mil nga kabtangan sa mga biktima.

Matud pang SFO2 Ricardo Villarete nagsugod ang sunog diha sa panimalay nga gipanag-iya ni Malene Hilongos nga giukopar ni Giovanni Danoncian.

Wala pa matino sa kabomberuhan kung unsay hinungdan sa insidente apan sagad sa mga panimalay ginama lang sa mga kahoy maong dali ra kaayong mikatap ang kalayo.

Niadtong milabayng Biyernes sa kaadlawon naugdaw ang 39 ka panimalay sa sitio Putat sa Tinago diin naapil sa kaugdaw ang balay ni city fire investigation section chief, SFO3 Allen Arciaga.

Sa pasiunang imbestigasyon sa maong sunog gidudahang ang sub-standard nga ceiling fan nga gigamit sa magtiayong nag-okupar sa kumbento sa gamayng kapilya sa United Church of Christ in the Philippines ang nakaingon sa sunog.

Ang bulan sa Marso maoy giisip nga labing init nga panahon sa tibuok tuig, mao usab kini ang dunay daghang kaso sa insidente sa sunog nga natala matag tuig maong ning bulana gitumong ang kampanya batok sa sunog.

Samtang sa laing bahin nahibulong si SFO2 Feliz Romero usa sa mga fire investigator sa kabomberuhan sa dakbayan nga miresponde sa alarma sa sunog diha sa sitio Kanaas sa Guadalupe niadtong Biyernes sa alas 10 sa gabii.

Kini tungod sa usa ka luna nga magpunay og aso ug nagbaga ang yuta sa ilawom dihang ilang naabtan, hinuon walay panimalay nga gitarok sa maong luna.

Matud pang Romero ilang gipasiritan ang maong luna og usa ka trak nga tubig niadtong tungura apan usa sa iyang mga kauban miingon nga dunay parte sa maong luna nga dili motuhop ang tubig.

Sumala pa sa nakuhang kasayuran ni Romero matag ting-init sama ning bulana moaso ra og iya ang maong luna ug magbaga ang yuta, sama sa iyang nasaksihan niadtong gabhiuna diin samtang nagpasirit ila usab gikubkob ang yuta diin namatud-an niyang gabaga gyud ang ilawom niini.

Dugang pa niya nga kaniadto kung moaso ang maong yuta kung itsahan kini og papel mosilaob kini, matud pang Romero nga aron matino kung unsay hinungdan niini mikuha sila og sampol sa yuta aron ipa-eksamin sa mga eksperto.

Gikatahong upat na ka tuig ang milabay dihang nagsugod ang maong panghitabo sa maong luna.