39 ka balay gilamoy sa sunog

Sunog nga miulbo sa ikaduhang adlaw sa Fire Prevention Month milamoy sa 39 ka panimalay lakip na ang balay sa hepe sa fire investigation section sa kabomberohan sa dakbayan sa Sugbu kagahapon sa kaadlawon.

Ang sunog nahitabo diha sa sitio Putat sa barangay Tinago ning dakbayan nga nagsugod sa gamay'ng kumbento sa kapilya sa United Church of Christ of the Philippines.

Ang kabomberohan nakadawat sa alarma alas 12:18 ug nakontrolar kini human sa 1:10 apan hingpit gyud nga napawong ang kalayo alas 4:15 na sa buntag.

Matud pang SFO2 Felix Romero sa pakighinabi sa Banat News nga ang nag-okupar sa maong balay mao ang gipalagpot sa UCCP nga pastor nga si Dominador Mag-usara,71, ug asawa niining si Rose Mag-usara,66.

Ang sunog gidudahang nagsugod sa sub-standard nga ceiling fan sa magtiayon nga gibutang sa kisame, apan ang magtiayon kusganong mihimakak niini sanglit nangangkon silang ila kining gipawong una pa sila matulog.

Ang mga silingan sa mga Mag-usara lakip na si SFO3 Allen Arciaga kinsa kasikbit ang balay sa kapilya mitabang pa pagpalong sa kalayo apan gumikan kay ginama ra sa kahoy ug kusog usab ang hangin wala na kini kapugngi.

Si Arciaga human makadungog sa singgit sa mga silingan kabahin sa sunog daling mipukaw sa iyang pamilya ug mimando nga ipahipos ang tanang mahipos nga gamit palayo sa dapit sanglit motabang siya pagpawong sa kalayo diha sa kapilya.

Apan pagbalik ni Arciaga iyang balay na usab ang nagdilaab hinungdan nga mitabang nalang siya sa ubang mga silingan sa pagpalayo kanila sa peligro.

Ang sunog giisa ngadto sa general alarm, ug mikabat og P800 mil ang danyos.

Matud pang Romero nga mao na kini ang ikatulong higayon nga nasunogan ang maong sitio sukad niadtong 1988, ang labing ulahing hitabo niadtong 2003.

Atol sa sunog dunay tulo ka residente ug usa ka bombero ang nangaangol. Si FO3 Ramon Molina sa Parian fire sub-station nasamdan sa iyang walang tudlo, samtang napaso usab ang 87 anyos nga si Flaviana Valiente sa tuong bukton.

Nangasamdan usab sa ilang mga lapalapa ang magsuong sila si Michael 21,ug Marvin Pasana,27, nga mga pag-umangkon ni Arciaga.

Mipadala na og mga dugang hinabang ang dakbayan sa mga biktima lakip na mga limpyong tubig, gamit sa kusina ug katulgan diha sa temporaryo nilang gibutangan sa multi-purpose hall sa barangay.

Si Cebu City Fire Marshal, Ismael Codilla mitug-an sa mga tigbalita nga makig-coordinate sila sa buhatan sa Department of Trade and Industry kabahin sa mga sub-standard nga mga baligyang electrical appliances nga sagad mapalit sa mga baratilyo.

Matud pa sa opisyal nga ang mga sub-standard nga mga butang maoy sagad nga makaingon sa mga sunog.