Kasong lugos batok sa kapitan giduso na sa RTC

Giduso na niadtong Huwebes ni Talisay city prosecutor Marshal Rubia diha sa korte ang kasong pagpanglugos batok ni Ramil Manayon kapitan sa Barangay Manipis, dakbayan sa Talisay.

Kahinumduman nga si Manayon gipasanginlang miunay sa paglugos sa iyang 15-anyos nga ig-agaw diin ang maong insidente nahitabo niadtong Nobiyembre 24, 2006 diha sa balay sa ilang apohan sa Barangay Lawaan I sa maong siyudad.

Ang maong kaso no bail bond o ang suspetsado wala tugoti nga makapiyansa para sa iyang temporaryong kagawasan.

Si Manayon mihimakak sa maong pasangil batok kaniya diin matud pa niini sa iyang giluwatang tubag ngadto ni Rubia nga wala niya imbitaha ang iyang ig-agaw og pagtan-aw og concert.

Ang ilang mga kauban dihang nanglakaw sila nianang gabii sa petsa 23 sa maong buwan gihatud niya sa mga balay niini mga alas 9:00 sa gabii apan ang iyang ig-agaw nagdumili sa pag-uli sa ilaha ug nagkanayon kini nga adto siya matulog sa balay sa ilang apohan diha sa nahisgutang barangay.

Si Manayon nagkanayon nga pag-abot nila sa balay sa ilang apohan nakatulog siya ug iyang namat-an mga alas 3:00 sa kadlawon diha pa ang iyang ig-agaw hinungdan nga iya kining gikuyogan diha sa eskina diin nag-atang sila og taxi nga ilang kasakyan para paingon sa balay sa iyang ig-agaw.