Mga opisyal sa Cordova uyon sa golf course

Si Mayor Arleigh Sitoy sa lungsod sa Cordova ug ang ubang opisyal sa lungsod uyon sa tukorong golf course sa lugar kung makatuman kini sa mga rekisitos.

Sa gipahigayong press conference kagahapon sa buntag, si Sitoy ug ang mga kaubanan niining konsehal ug barangay kapitan sa lugar nagkanayon nga uyon sila nga matukod ang maong golf course kung kini makahatag og igong kaayohan sa mga residente sa lungsod.

Matud ni Sitoy nga dili siya mobabag sa maong plano nga ibutang unya sa usa ka investor kung ugaling kompleto lang kini og rekisitos ug kinahanglang mosunod ang maong investor sa patakaran sa balaod nga mo-comply gyud og rekisito una pa kini motukod sa proyekto.

Ang mayor nagkanayon nga walay nahitabo nga kadaut sa kinaiyahan sa iyang lungsod sukwahi sa nanggawas niini nga mga balita kalabot sa environmental issue.

Si Sitoy mipahibawo ngadto ni Gobernador Gwendolyn Garcia kalabot sa nahisgutang proyekto apan gitun-an pa kini karon sa gobernador.

Gihulagway ni Sitoy nga usa ka pre-mature pa ang maong isyu tungod kay hangtod karon nagpaabot pa siya sa proposal sa proponents.

Ang mga konsehal ug barangay kapitan nga mga kauban ni Sitoy nabalaka nga dili mopadayon ang proponents kung modaku ang isyu tungod kay alang nila kahigayonan na kini sa ilang lungsod nga adunay investor nga motukod og negosyo diha sa ilang lugar.