Kawani sa SPEED wa mokooperar sa imbestigasyon sa gibaligyang medical equipment sa mga junkshops

Gitapos na sa Cebu City Hall ang imbistigasyon niini batuk sa usa ka kawani sa Squatters Prevention Encroachment and Elimination Division (SPEED) nga gipasanginlang maoy responsable sa illegal nga pagpamaligya sa mga gubaong medical equipment sa siyudad ngadto sa usa ka junkshop nga wala mag-agi sa hustong proseso.

Ang consultant sa Urban Poor sa City Hall, Gerry Marquez nakahukom nga sirad-an ang mao niyang imbestigasyon human nagdumili pagkooperar ang suspek nga si Enriquita Despi nga kawani sa SPEED tungod kay bisan og nitunga kini sa gihimong pagsukit sukit niadtong nilabay'ng adlaw nagdumili gihapon kini pagluwat og dugang mga pamahayag may labot sa maong kontrobersiya.

Kumbinsido gyud si Marquez nga gawas kang Despi duna pay ubang mga tawo sa maong buhatan nga kunsabo sa maong illegal nga pagpamaligya sa mga gi-junk na nga medical equipment sa siyudad bisan paman og nagdumili sa pagtug-an niini si Despi.

Dako usab ang pagtuo ni Marquez nga mosobra pa sa duha ka libo ka kilo nga mga medical equipment ang nabaligya ngadto sa junkshop tungod sa nangahanaw nga butang diha sa SPEED.

Iduso ni Marquez ngadto sa buhatan sa City Attorney's Office ang resulta sa iyang imbestigasyon aron ang maong buhatan mao nay motimbang timbang alang sa mas lapad pang imbistigasyon aron gyud matumbok og mapasakaan og tukmang kaso ang mga responsable niini.

Hangtud sa paghimo ning balita wala pa usab makaduso og notisya ang City Hall ngadto sa Pardillo junkshop ang nakapalit sa mga gipamaligya nga butang sa siyudad nga gimando ni Osmeña nga pasirad-an ang operasyon niini tungod sa pagpamalit og mga kinawat nga butang.