Nanglangoy og 10 ka kilometro

Lima ka tawo ang nanglangoy gikan sa lawod mga 10 kilometros ang gilay-on paingon sa baybayon sa Barangay Kawit, lungsod sa Medellin human ang bangkang de motor nga ilang gisakyan nalunod diha sa Barangay Kinatarkan, lungsod sa Santa Fe.

Ang kapolisan sa Medellin miila sa mga survivor nga si Jonathan Gomez tag-iya sa bangka, Cayatano Avila timonel sa bangka, Edwin Lacierto, Enerio Palajos ug Renato Avila pulos hingkod ang mga panuigon og mga residente sa Barangay Bakhaw, Almagro probinsiya sa Samar.

Walay gikataho nga naangol sa lima ug gidala na kini diha sa buhatan sa Department of Social Welfare and Development (DSWD) para mahatagan sila og ayuda.

Si SPO1 Manuel Alann Tan, desk officer sa kapolisan sa Medellin nagkanayon nga ang mga survivor mibutyag kanila nga mga alas 2:00 pa sa hapon niadtong Huwebes nalunod ang ilang gisakyang bangka ug naabot sila diha sa Sitio Balintawak Biyernes sa kaadlawon.

Ang kapolisan sa Medellin nakadawat og tawag mga alas 6:30 sa buntag niadtong Biyernes gikan ni Tirso Seares, konsehal sa Barangay Kawit kinsa mitaho kabahin sa maong insidente.

Base sa pasiunang imbestigasyon sa kapolisan nga ang lima ka survivor nagbiyahe gikan sa Catbalogan, Samar diin ang bangka niining gisakyan gikargahan og sinakong kinhason nga Tahong nga idiskarga unta diha sa lungsod sa Tuburan, Cebu.

Apan pag-abot diha sa lugar nga nahitaboan nalunod ang bangka nga gisakyan sa mga survivor tungod sa kadagko sa mga bawod.

Si Tan midugang nga ang mga survivor nagpaanod-anod na lang sa sulog sa dagat ug pabor sa hangin nga paingon sa Kawit para dili sila maglisod og langoy ug madagsa dayon sa baybayon.