Aron sa pagmatuod sa iyang pangagpas, si Osmeña nanghagit og pustahanay nga seguradong maparot si Sonny bisan diha sa iyang kaugalingong presento.
Atol sa press conference kagahapong adlawa, gibutyag ni mayor Osmeña nga ang iyang ig-agaw nga kanhi senador nahimutang lang gani sa ika-12 nga puwesto diha sa kaugalingon niyang presento sa miaging eleksyon.
Matud sa mayor nga usa lang ka botos ang labaw ni Sonny sa kandidato nga nagsunod kaniya sa ika-13 nga lugar, ug nagpasabot nga kun wala pa mobotar si Sonny sa iyang kaugalingon, anaa siya sa ika-13 nga dapit.
May tambag si Osmeña sa iyang ig-agaw nga dili na unta mag-apil-apil sa politika tungod kay wala na makagusto kaniya ang katawhan, ilabi na ang mga Sugboanon.
Daghan sa mga Sugboanon ang wala na makagusto ni Sonny ilabi na dihang nahimo siyang alalay kaniadto ni kanhi Presidente Estrada ug miingon nga ang Sugbo magpuasa sa mga hinabang gikan sa nasudnong kagamhanan.
Ang panagbangi ni Osmeña ug sa iyang ig-agaw nga si Sonny nagsugod dihang wala sila magkaparehas og gisuportahang kandidato sa eleksyon kaniadtong 1994.
Si Sonny didto misuporta ni Danding Cojuangco kontra ni kanhi Presidente Fidel Ramos, nga maoy gipaluyohan nila ni Osmeña ug kanhi Gobernador Lito Osmeña.
Pipila hinuon ka mga politikanhong tigpaniid namahayag nga ang bansagon ni Sonny makatabang kaayo aron siya dali rang mahinumdoman sa mga botante atol sa eleksyon.