Amahan, 2 ka anak nag-ilog kinsay mag-mayor

Aron malikayan ang kagubot sa umaabot eleksiyon sa lungsod sa Tabuelan, nakahukom ang usa ka amahan nga kanhi mayor nga modagan sa pagbalik aron wala sa duha niya ka anak ang mag-ilog sa maong katungdanan.

Gipahibalo ni kanhi Mayor Casiano Gerona ang iyang pagpapili sa pagka-mayor sa umaabot eleksiyon human nag-ilog ang iyang mga anak nga sila si kanhi Mayor Rex ug Mayor Raul sa maong katungdanan.

Gikataho ang posibling panag-atbang nilang Rex ug Raul sa eleksiyon karong Mayo kon dili gyud mahilot kon kinsa sa ilang pamilya ang modagan sa pagka-mayor.

Si Casiano dugay nga nahimong mayor sa lungsod sa Tabuelan ug nahunong kini sa dihang gidid-an na sa balaud nga makapasubli sa tuig 1998.

Mihulip kaniya si Rex ug nasubli-an sa pagkapili sa eleksiyon sa tuig 2001.

Matud pa ni Casiano nga niadtong eleksiyon sa tuig 2004, nihangyo ang iyang anak nga si Raul nga modagan sa pagka-mayor ug molingkod sa usa lang ka termino.

"Ang amo sabot nga usa lang ka termino siya molingkod, dili naman hinoon mabarug," sumala pa ni Casiano.

Nunot niini, matud pa ni Casiano nga iyang pahunungon si Raul samtang himoon niyang bise-mayor si Rex sa eleksiyon karong Mayo.

Si Casiano nagkanayun nga nakapalibog kaayo sa ilang mga tigpaluyo ang gikataho nga panag-atbang sa duha niya ka anak maong namugna ang iyang hukom aron paghiusa sa ilang mga tigpaluyo.