Priso namatay sa meningitis

Gihimakak sa kadagkoan sa Bagong Buhay Rehabilitation Center nga gibun-og ang pinirisong namatay kagahapon sa kaadlawon diha sa emergency room sa Cebu City Medical Center.

Si Sr.Insp. Gil Inopia, ang operations chief sa BBRC mitug-an sa Banat News nga wala bun-oga si Rando Sala sukwahi sa pagduda sa mga kabanay nila sa giingong mga bun-og nga nakit-an diha sa iyang patay'ng lawas.

Matud pang Inopia nga si Sala nga may kasong rape, namatay kagahapon sa kaadlawon samtang giatiman sa mga doktor tungod sa sakit nga acute bacterial meningitis base usab sa findings sa death certificate niini.

Si Inopia nagkanayon nga ang nakitang mga bun-og sa lawas ni Sala daan na kini niining nahiaguman dihang nasulod kini sa BBRC niadtong Enero 8.

Ang medical certificate ni Sala sa gihimong eksaminasyon sa iya niadtong Enero 8 gikan sa CCMC nga pinirmahan ni Dr.Gloria Duterte nagpakita nga duna kini samad diha sa iyang ubos nga bahin sa ngabil, bun-og diha sa baba niini.

Gikatahong si Sala gipasanginlang milugos sa usa ka bayot ug posibleng gikulata kini dihang nadakpan.

Sumala pang Inopia ang amahan ni Sala mitug-an kanila nga duna na kini daang sakit nga patol, gani may gitumar kining tambal alang niini, niadtong nasulod kini sa BBRC matud pang Inopia wala nila tangtangi dayon og posas si Sala tungod kay bayolente kini.

Tungod sa kundisyon sa sakit ni Sala, gibutang kini sa bag-ong BBRC sa Kalunasan sanglit ang infirmary sa BBRC gibalhin na usab didto.

Niadtong Sabado gikatahong gipatol kini maong gidali kini og padala sa CCMC sa mga sakop sa Emergency Rescue Unit Foundation apan nakabsan kini sa kinabuhi kagahapon sa kaadlawon.