Sa mga mipadayag na sa ilang kandidatura alang sa pagka mayor sa dakbayan, si Konsehal Jonas Cortes lamang ang adunay tandem nga kandidato sa pagka bise mayor nga mao si Konsehal Glenn Bercede.
Si Bise Mayor Amadeo Seno kinsa mipadayag na sa iyang kandidatura sa pagka mayor wala pa makapili og iyang bise-mayor apan posible usab nga si Konsehal Elmer Cabahug.
Samtang si kanhi Konsehal Magno Dionson nga mipadayag na sa iyang kandidatura alang sa pagka mayor sa dakbayan ang nagpabilin pa usab nga bakante ang iyang bise mayor apan posible usab nga si Areston Balodong Cortes.
Kahinumdoman nga si Balodong Cortes, mikandidato alang sa pagka mayor sa dakbayan sa nangaging mga piniliay ug posible nga magbise mayor sa umaabot nga piniliay sanglit kandidato man pagka mayor iyang igsoon nga si Konsehal Cortes.
Si Mayor Thadeo Ouano nga gikahinabi sa Banat News miingon nga ang mga panghitabo sa politika sa dakbayan karong panahona dili na bag-o alang kanila.
Ang panag-atbang sa mga politiko sa dakbayan nasinati na usab sa panahon sa iyang amahan nga si kanhi Mayor Alfredo Ouano.
Dugang pa niya nga gipaningkamutan sa iyang amahan nga mahiusa ang tanan sa Mandaue sanglit makahatag man og dili maayong epekto ang pagbahinbahin sa serbisyo sa katawhan ug gitinguhang kalamboan sa dakbayan.