Limpyong tubig ug di mga linagang dahon ang tambal sa kalibang — DOH7

Dahon sa abokado, bayabas, ug kaymito dili maoy tambal batok sa diarrhea matud ni Suzanna Madarieta ang assistant director sa Department of Health - 7.

Matud pa ni Madarieta sa Banat News miingon nga ang paglaga ug dahon sa abokado, bayabas ug kaymito dili makaayo sa diarrhea kon dili fluid replacement lang kini sa lawas ug wala pa matino sa siyensa kon mahimo ba kining tambal alang sa maong sakit.

Sanglit kinahanglan man kini ug intensive research una pa kini ideklarar nga usa ka tambal. Sagad sa mamatyan sa mga biktima sa maong sakit mao ang pagkahurot sa tubig sa lawas tungod sa pagsuka, kalibanga ug grabeng pagsingot.

Gitin-aw ni Madarieta nga kinahanglan nga hugasan ug maayo ang maong mga dahon sa dili pa kini lagaon aron malikayan ang laing kada-ot sa panglawas sa usa ka tawo, labaw sa tanan mao ang limpyong tubig ilimnon.

Si Dr. Angelita Salarda sa Department of Health nga gikahinabi sa Banat News nga kinahanglan nga magbinantayon ang Sugbuanon sa ilang lawas ug maglimpyo kanunay sa kamot ug palibot aron malikayan ang susamang nahitabo sa Loon, Bohol.

Matud pa ni Salarda nga wala hinuoy natala sa ilang buhatan kabahin sa diarrhea sanglit hugot man ang ilang pagmonitor niini dinhi sa dakbayan sa Sugbo.