Lawas sa patay ilawom sa tulay iya's airport police

Usa ka airport Police ang nakit-ang patay nga naglutawlutaw sa kadagatan ubos sa Marcelo Fernan Bridge sa milabay'ng udto.

Kini ang nasayran gikan ni SPO2 Rolito Jumao-as sa Homicide Section sa kapolisan sa dakbayan sa Lapulapu.

Matud pa ni SPO2 Jumao-as nga personal nga mikonpirmar ang igsuon sa biktima nga si Catalino delos Reyes nga iyang manghod ang napalgang patay nga si Mario delos Reyes, 48, minyo nga lumad sa Tabunok, Talisay ug sakop sa airport police sa Mactan Cebu International Airport.

Matud pa ni Catalino sukad pa niadtong Lunes wala na makauli ang iyang igsuon sa ilang panimalay ug sa dihang mitawag kini sa ilang opisina sa airport police sa MCIA wala na kini mag-duty sukad niadtong Martes.

Si Catalino nga nakadungog sa sibya sa radyo ug sa mga gihatag nga detalye sa maong patay'ng lawas midali siya pagpakita sa lokal nga punerarya ug mikonpirrmar nga mao kini ang patay'ng lawas sa iyang igsuon.

Gihulagway sa mga kauban ni delos Reyes sa police force sa MCIA, usa ka maayong tawo si Mario ug wala sila makadungog nga duna kini kontra ug nakaaway sa milabay'ng mga adlaw.

Hinuon si SPO2 Jumao-as usab padayong naghimo og dugang imbestigasyon sa kamatayon ni delos Reyes ug ang motibo sa kamatayon niini.

Kahinumduman nga sa milabay'ng udto nakit-an kining patay nga naglutawlutaw sa kadagatan ubos sa ikaduhang taytayan sa mga sakop sa PNP Maritime Police human sila mipahigayon og security patrol sa Mactan channel.