Grade 6 gi- 'sex slave' sa uyoan

Usa ka 13-anyos nga tinun-an sa grade six nabiktima sa pagpanglugos makadaghang higayon susamang gihimo siyang sex slaves sa iyang giilang uyoan diha mismo sa ilang gipuy-an sa Carreta ning dakbayan sukad pa niadtong milabay'ng tuig.

Ang biktima nga gihinabi sa Banat News kagahapon sa buhatan ni Kapitan Marciano Ando sa Carreta nga nagsugod ang pagpanglugos niadto pang milabay'ng tuig.

Si Grace (tinuod ngan gipugngan) wala nay inahan ug amahan ug diha na mipuyo sa balay sa iyang apohan sa nahisgutang barangay, mitug-an nga matag siya lugoson hulgaon siyang patyon sa suspek.

Ang suspek nga nasikop sa mga tanod sa Carreta diha sa trabahoan sa Lagtang, Talisay niadtong Miyerkules giilang si Jay Villacarlos dela Cruz,37 anyos ug residente sa Carreta uban sa biktima apan lumad nga taga Medillen.

Ang biktima mitug-an nga wala na niya kahinumdomi ang unang higayon apan ang ikaduhang paglugos nahitabo niadtong bulan sa Pebrero sa milabay'ng tuig, nasundan kini niadtong Mayo 8, sunod sa bulan sa Disyembre 25 samtang ang mga tawo namahuway tungod sa selebrasyon sa milabay'ng gabii.

Ulahing insidente sa paglugos nahitabo niadtong Enero 1, ning tuiga, sa buntag diha gihapon sa lawak nga gikatulgan sa biktima.

Matud pa sa biktima nga matag siya lugoson hulgaon siya kanunay sa suspek nga patyon maong wala na siya magsumbong.

Apan niadtong milabay'ng Miyerkules, nakahukom ang bata sa pagsugilon sa hitabo human mipasalig ang iyang maguwang nga panalipdan batok sa suspek.

Dihang giila sa biktima si dela Cruz daling gilusad sa hepe sa mga tanod sa Carreta nga si Andres Casas ang pagpangita sa suspek kinsa didto na madakpi sa Talisay.

Si Casas ug si Ando mitug-an sa Banat News nga wala gyud moasister ang mga polis sa Talisay nga ilang gipangayoan og tabang aron pagsikop sa suspek sa rason nga milapso na kini ug wala maaktuhi paglugos ang suspek.

Matud pa buot sa mga polis sa Talisay nga ipakiha na lang ang suspek ug ipahuwat na lang ang warrant of arrest una pa dakpon, apan sa habig ni Casas mao pa may pagpahibalo sa bata sa pait niining naagian sa suspek tungod usab sa hulgang siya patyon.Nadakpan si dela Cruz nga walay polis sa Talisay nga kuyog.

Gikatahong positibong gihilabtan ang bata base sa resulta sa eksaminasyon sa pink room apan gikinahanglan pa kining susihon pag-usab aron pagtino kun mabdos ba kini.

Samtang si dela Cruz nga gihinabi sa Banat News kusganong mihimakak sa pasangil ug nangangkong iyang giilang anak ug igsuon ang biktima.

Matud pa niya posibleng nasuko lang kini kaniya tungod kay siya maoy kanunay'ng mangasaba niini kun dugay mouli inig ka gabii.