Anak sa unang bana ni Malou Loot mag-mayor

Dili na mapugngan ang pagpapili sa pagka-mayor sa batan-ong anak ni Daanbantayan Mayor Maria Luisa nga si Sun Shimura sa eleksiyon karong Mayo.

Gipahibawo ni Loot nga nagsige na og suroy si Sun sa piyesta sa kabarangayan ug mitambong na kini og mga pundok-pundok sa mga batan-on, ingon man sa mga tunghaan ug gipahatag sa iyang pagpakigpulong.

Si Sun anak sa unang bana nga Hapon ni Loot sa wala pa sila naminyo ni Sr. Supt. Vicente Loot, ang hepe karon sa Cebu Police Provincial Office.

Masaligon si Loot nga makamao na nga motubag si Sun sa mga isyu nga ilabay batok kaniya niining iyang pag-apil sa politika.

Apan sumala pa ni Loot nga maglisod pagpangita og isyu ang kontra gumikan kay walay dautang rekord si Sun ug buotan kini nga pagkabatan-on sa lungsod.

Dugang pa ni Loot nga bisan ugma pa ang eleksiyon, andam na si Sun, sanglit gidawat na kini sa kinabag-an sa katawhan sa lungsod.

Si Loot kinsa dili na makapasubli sa pagka-mayor sunod eleksiyon subay sa balud, maoy modagan sa pagkabise-mayor kauban sa iyang anak.