Usa patay samtang 17 ang naangol sa aksidente

Usa ang namatay samtang 17 ang nangaangol sa nahitabong panagbangga sa kadalanan nga miresulta sa pagkalandig sa tambalanan sa nagsingabot ug sa pagsaulog sa Pasko sa managlahing lugar dinhi sa probinsya sa sugbo.

Kini nahitabo sa Minglanilla, Carcar, ug Boljoon niadtong Sabado ug Domingo.

Ang namatay mao si Jupiter Lauglaug, 19, ulitawo nagpuyo sa Calinganan, Carcar kinsa nagmaneho sa Aura nga motorsiklo gikan sa Valencia paingon sa Poblacion, ug naangol usab ang iyang mga angkas human ilang ikasugat ang nagbinugtaway nga laing motorsiklo.

Ang laing drayber sa motorsiklo nga naangol mao sila Quijano Manayaga, 21, ulitawo nagmaneho sa Aura nga motorsiklo ug Juanito Arante, 20, ulitawo nagmaneho sa Crypton ug nagpuyo sa Olango, Aloguinsan Cebu.

Ang mga angkas sa tulo ka motorsiklo mao sila si Mariciana Lauglaug, 21, Wilfredo Gaitera, 36, nagpuyo sa Calingnan, Carcar ug ang backrider sa namatay nga si , Jimboy Labrador 24, Ernesto Arante 16, Monica Ceran 46, Sergio dela Cerna 46, ug nagpuyo sa Olango Aloguinsan.

Sa imbestigasyon sa kapolisan, ang duha ka motorsiklo nga gimaneho ni Manayaga ug Arante gikan sa Poblacion, Carcar paingon sa Valencia ug si Lauglaug ilang gikasugat.

Gikatahong nagginukdanay sila si Manayaga ug Arante apan sa dihang buot untang mo-overtake si Manayaga ngadto ni Arante sa may Sitio Tal-ot, Valencia iyang nasugatan si Lauglaug ug nagkabangga hinuon.

Ang tulo ka motorsiklo nangatumba lakip na ang ilang mga sakay ug daling gihatud sa tambalanan apan si Lauglaug maoy nakabsan sa kinabuhi pag-abot sa Carcar District Hospital samtang ang uban gibalhin sa Vicente Sotto Medical Center.

Sa Minglanilla, naangol ang asawa sa polis nga si Rosalita Fuentes, human ang honda Civic nga gimaneho sa iyang banang si SPO4 Gualberto Fuentes ug laing lima ka mga batan-on nga nagbarug-barog sa dalan nadasmagan human maigo sa naghaguros nga mini bus nga gimaneho ni Anthony Calinawan diha sa Tunghaan Minglanilla.

Ang lima nga naangol mao sila si Mutya Denci 23, ug ang igsuong si Venus 22, Rhoda Carlon, Jammy Gonzales ug ang ginganlan ug Ela pulos mga residente sa Spring wood Subdivision sa maong Lungsod.

Sila si Alter Erespe 28, minyo ug Jerson Derama 18, ulitawo nagpuyo sa Poblacion ang anaa karon sa tambalanan human mahulog ang ilang motorsiklo sa pangpang.