Polis ug anak sa ex-police 'sukmagay

Usa ka polis ug nagpailang anak og polis kinsa parehong namuwang nagsumbagay niadtong Huwebes sa gabii diha sa Tabunok sports complex dakbayan sa Talisay.

Si PO2 Michael Santino Cortez taga Biasong, Talisay nadestino sa Barili Police Station ang unang mitaho kabahin sa nahisgutang insidente sa kapolisan sa Talisay.

Si PO2 Cortez mipasangil ni Emmanuel Ravina, 42, taga Pardo, niining dakbayan nga hubog ug nagpaila nga anak og kanhi polis ug gisukmag niini sa tangkugo duha ka higayon.

Base sa imbestigasyon sa kapolisan sa siyudad nga ang duha diha sulod sa buwangan nga parehong namusta.

Nakadaog si PO2 Cortez sa nahisgutang sugal ug nasuko kaniya si Ravina. Sa walay pangutana gisukmag ni Ravina si PO2 Cortez sa tangkugo.

Si PO2 Cortez nagpaila nga usa siya ka polis apan si Ravina nagpaila usab nga usa siya ka anak sa kanhi polis. Tungod sa kauwaw ni PO2 Cortez mibawos kini sa pagsukmag ni Ravina sa nawong.

Si Ravina mipa-blotter usab diha sa kapolisan sa Talisay ug mipasangil ni PO2 Cortez nga wala mobayad sa pustada ug gisukmag siya niini sa nawong tulo ka higayon ug gihulbutan pa siya sa .45 nga pusil niini.

Si Insp. Ricardo Nayne, hepe sa kapolisan sa Barili mibutyag kagahapon sa Banat News nga ipa-ubos niya sa imbestigasyon si PO2 Cortez ug kun mapamatud-an nga nakabuhat kini og kalapasan iduso niya sa hingtungdang buhatan sa Cebu Provincial Police Office (CPPO) ang maong kaso.