Ang gidakop giilang si Eric Vilbar,27, lumad nga taga Matalom Southern Leyte kinsa misuway na unta og sakay og fastcraft diha sa maong pantalan dihang "naratol" ug midagan.
Ang gwardiyang si Jiji Jumantoc kinsa maoy nagbantay sa terminal sa Ocean Jet kasamtangang naniksik sa mga bagahe sa mga pasahero dihang ang bag na ni Vilbar ang girekisa nagmagahi kini.
Apan ang gwardiya dili motugot nga siya pasudlon maong miinsister kini nga rekisahon ang bag niini apan ang suspek gikatahong mikalit og dagan hinungdan nga nagbinirahay ang duha sa maong bag.
Gumikan kay mas dako ang suspek naguroy niini ang gwardiya apan wala kini makabantay nga diha sa gawas sa terminal dunay mga sakop sa Task Force Alalay nga nagbantay sa pantalan isip pangandam sa Asean Summit.
Ang suspek nakwelyuhan ra dayon sa mga sundalo ug gidala sa Maritime police diin kini giimbestigahan, diha sa iyang bag nakit-an ang mga pinaugang dahon sa Marijuana nga dul-an tunga sa kilo ang gibug-aton ug siyam ka paketeng may sulod nga gidudahang shau.
Sumala pa sa report sa DyAB, ang suspek miangkong napalit niini ang maong mga iligal nga drogas diha sa Lorega-San Miguel ug iya untang dad-on sa Matalum aron iyang "pangkonsumo" karong umaabot nga kapaskuhan.