Secret marshals gustong ipadali og patuman sa Cebu

Giawhag sa tsirman sa Police Coordinating and Advisory Council (PCAC) chairman Bise Mayor Micheal Rama ang kapolisan nga dalion sa pagpatuman ang mga secret marshals aron motabang pagpatunhay sa kahusay ug kalinaw dinhi sa dakbayan sa Sugbo ilabina niining nagsingabot nga Pasko.

Atol sa press conference kagahapon sa buntag gipadayag sa bise mayor nga dako og ikatabang ang mga secret marshals aron mapakgang ang pagsiaw og balik sa mga pagpanulis ilabi na sa mga pasahero sa PUJ.

Wala malipay ang bise mayor sa pagpusil sa kanhi reporter sa The Freeman, igsuon ning pamantalaan nga si Marie Deltan Galeos, taga lungsod sa Naga nga nalandig sa tambalanan human gipusil sa gikasakay nga suspetsadong tulisan dihang misukol kini.

Nanghinaot ang bise mayor nga tinud-on sa kapolisan ang pagpatuman og balik sa mga secret marshals nga mosakay sa mga PUJ aron mag-monitor niadtong mga tulisan nga mamiktima sa mga pasahero.

Si Police Regional Office (PRO-7) Director Shief Supt. Silverio Alarcio Jr. maoy mimando pagpabarog og balik sa secret marshals tungod sa pagsiaw sa mga pagpanulis ning miaging mga adlaw.