Mayor kuhaan og gahum sa labor disputes gisaway

Gisaway ni Mayor Tomas Osmeña ang sugyot nga dili na tugotang makapanghilabot ang mga mayor sa kalungsoran ug dakbayan paghilot sa labor dispute sa usa ka kompaniya nga nahimutang sa ilang hurisdiksyon.

Ang Alliance of Progressive Labor (APL) maoy miduso ning maong lakang human ilang gihulagway nga walay igong kasinatian ang mga mayor pagsulbad sa maong problema ug gikabalak-an pa nila nga makapasamot pa unya kini sa motumaw nga kagubot ug labaw sa tanan wala pay rekord ang mga mayor nga nakasulbad og problema nga susama niini.

Apan giinsister ni Osmeña nga dili makiangayon ang maong tinguha tungod kay matud niya dunay ubang mga mayor nga dako og nahimo pagsulbad sa mga mitumaw nga labor dispute.

Gihimong sanglitanan ni Osmeña ang iyang kaugalingon dihang gisulbad niini ang panagbangi sa management sa Metro Cebu Water District (MCWD) ug sa mga kawani niining sakop sa unyon ug ingon man ang nahitabong kagubot kaniadto sa unyon sa Atlas Mining Corporation sa Toledo.

Alang sa mayor gikinahanglan gyud nga manginlabot silang mga opisyal sa labor dispute ilabi na sa kompaniya nga nahimutang sa ilang lugar tungod kay apektado usab ang ekonomiya sa ilang lugar kun pasagdan nga modako ug dili masulbad ang maong problema.