Nasayran sa Banat News nga ang 22 ka mga empleyado gikan sa Metro Ware Inc. (MWI) nga nahimutang sa MEPZ 1 sa Ibo, Lapulapu.
Matud pa ni Vickie Rose Orpilla, ang MWI Corporate Services Director, nga sa 22 ka mga empleyado nga posibleng nabiktima sa food poisoning, upat lamang ang na-admit sa Mactan Doctor's Hospital sa Lapulapu gumikan kay sila ubos pa sa obserbasyon sa mga doktor, hinuon dili sila grabe.
Gipasabot ni Orpilla nga base sa reklamo sa mga trabahante mikaon sila og isdang "tulingan" nga giprito, sweet and sour ug inun-onan sulod sa ilang canteen mga alas 6 sa milabay'ng gabii.
Gumikan niini, si Orpilla mipatawag sa tanang nakakaon sa maong sud-an ug gidali pagdala sa Mactan Doctor's Hospital alang sa pagpa-checkup niini. Sa 22 ka empleyado, 18 lamang ang gipagawas sa tambalanan apan gihatagan og tambal.
Gimanduan usab ni Orpilla ang nagdumala sa maong canteen nga si Hazel Mortera nga ipaubos sa eksaminasyon ang iyang nahibiling sud-an nga tulingan aron masusi kun kini ba gyud ang hinungdan sa mga gibati sa mga empleyado.
Gawas pa niini, gipagawas na usab ni Orpilla ang tanang mga lamas ug condiments nga anaa sulod sa maong canteen ug mimando kini nga bag-ohan og mga sagol alang sa pagkaon sa mga empleyado.
Matud pa ni Orpilla nga ang ilang kompaniya dili gyud mopasagad sa ilang mga tawo ilabi na kun kini nagkasakit sulod sa oras tingtrabaho ug anaa sulod sa ilang buhatan nahitabo.
Wala pa hinuon silay lakang sa pagsilot sa tagdumala sa maong canteen gumikan kay wala pay miabot nga resulta sa maong eksaminasyon apan gipasalig ni Orpilla nga ilang pahibaw-on ang mga dagkong opisyal sa ilang kompaniya alang sa tukmang aksiyon niini.