Deperensiyado sa pangisip gisulong, napatay, nakabalos

Patay ang usa ka lalaki nga gituhoang dunay deperensya sa pangisip dihang gisulong sa iyang payag sa duha niini ka mga silingan aron komprontasihon, kabahin sa manok nga gikawat apan misangko sa mainiton nga panaglalis ug miresulta na hinuon sa pagpanigbas. Apan ang biktima, bisan nasamdan na nakabawos og tigbas human mailog ang pinote gikan sa usa sa mga miatake kaniya.

Nahitabo kini pasado alas 6 sa miaging buntag sa Luca, bukirang bahin ug gibanabang 20 ka kilometro ang gilay-on gikan sa Poblacion, Balamban.

Ang biktima giila sa kapolisan nga si Armando Tribunalo 35, minyo ug nagpuyo sa nahisgutang lugar. Ang gitumbok nga mitigbas ug mibunal og olisi sa biktima giilang sila si Severo Patigas, 70, minyo ug Leonilo Clarin 30 minyo pulos silingan sa biktima.

Samtang nahitabo ang pagpangtake, laing tulo ang nagsilibing "look out" nga sila si Urbano ug Roselio Clarin uyoan ug ig-agaw sa suspetsadong si Leonilo, ug si Fedelina Patigas, pag-umangkon ni Severo.

Ang biktima nga si Tribunalo nakaangkon og samad tinigbasan sa ulo nga maoy nakaingon sa iyang hinanaling kamatayon.

Ang duha ka mga gikatahapan nakaangkon usab og tinigbasan, si Leonilo dunay samad sa iyang bukton ug liog samtang si Severo ubay-ubay ang samad sa kalawasan ang naangkon niini ug gikatahong ania dinhi sa sugbo nagpatambal human gisusi sa kapolisan sa District Hospital

Ang kapolisan daling mitubag sa insedente human makadawat og pahibawo nga gipangulohan ni SPO1 Allan Patalingjug ug mga kauban nga miresulta sa pagkasikop ni Urbano Clarin apan ang iyang mga kauban wala madakpi human makaikyas.

Base sa pasiunang imbestigasyon sa kapolisan nasayran nga ang biktima nag-inusara sa payag ug gisulong kini sa duha ka mga suspek nga nagdalag pinote ug olisi ug gipukaw human ang biktima maoy gipasanginlan nga nangawat sa manok ni Severo.

Wala magdugay nahitabo ang pagpanigbas ni Severo ngadto sa biktima apan nakahigayon kini sa pag-ilog sa pinote ug gipanigbas ang duha maoy hinungdan nga nanagan ang duha palayo sa lugar nga pulos na mga samaran.