Lola, laing lalaki naghikog kay pulos giaway sa kapikas

Usa ka 75 anyos nga babaye ug usa ka lalaki ang naghikog human parehong nakabangi sa ilang mga kapikas niadtong milabay'ng buntag gikan sa managlahing dapit dinhi sa dakbayan.

Unang nataho sa kapolisan mao ang pagkadiskubre sa nagbitay nga patay'ng lawas ni Natividad Coca,75 anyos, residente diha sa punoan sa mangga duol sa ilang balay pasado alas 9 sa buntag.

Sa imbestigasyon ni PO3 Henry Estoy sa Homicide Section natino nga niadto pang Domingo sa hapon milakaw si Natividad nga wala mananghid dihang miabot ang bana niining si Agustin.

Matud pang Estoy nga niadtong Biyernes naglalis ang magtiayon gumikan lang sa galingonon nga mais ug hangtud niadtong Domingo wala magkaestoryahay ang duha.

Dihang wala na mahiuli si Natividad, gisugdan na nila kini og pangita sa palibot, si Agustin gikatahong nakabantay niadtong Miyerkules nga nawagtang na ang pisi sa ilang hayupan maong nagduda na kini dayon.

Usa sa mga nangita mao ang kabanay nilang si Antonio Cugay kinsa naagi sa may punoan sa mangga, di layo sa balay sa magtiayon diin iyang nakita si Natividad sa ibabaw gibana-banang 10 ka tiil ang gihabugon ug wala nay kinabuhi.

Walay nakit-ang foul play ang kapolisan sa patay'ng lawas niini gawas lang sa agi sa pisi diha sa iyang liog, nagduda si Estoy nga posibleng niadtong Domingo pa gyud kini sa gabii naghikog sanglit nagsugod na kini og kadugta dihang napalgan.

Ang ikaduhang naghikog niadtong Huwebes sa buntag mao si Rogelio Archival,28, mekaniko nga taga Da-o, Talamban ning dakbayan kinsa nakit-ang nagbitay sulod sa iyang payag.

Ang inahan ni Archival nga si Aristona,65 maoy nakakita sa biktima dihang misubay kini sa balay niini aron sunahon nganong wala niini kuhaa ang bugas.

Apan paglili sa inahan mao nalay iyang nakit-an nga nagbitay na kini, hinungdan nga mitawag siya sa iyang bana kinsa mao dayoy miguba sa pultahan, dunay nakit-ang garas diha sa tuhod ang kapolisan apan walay timailhang dunay kagubot diha sa sulod sa payag niini.

Matud pang PO3 Buenaventura Ursaiz sa Banat News nga duha na ka adlaw dihang gibiyaan kini sa iyang kapuyo tungod sa wala'y pagkasinabtanay.

Ulahing nakit-ang buhi si Archival nianang pasado alas 6 sa buntag sa susama'ng adlaw.