Mga pawnshop gimonitor

Gimonitor sa kapolisan sa Argao ang tanang pawnshop sa mga kasikbit nga lugar nga posibling prendahan sa kuwentas ni Sr. San Miguel nga gikawat sa wala mailhing mga kawatan niadtong milabay'ng buntag.

Si PO1 Renato Nacaytuna nga nahinabi sa Banat News mitug-an nga bugtong nilang paglaom nga mailhan ug matudlo ang kawatan sa usa ka saksi aron hingpit nang masulbad ang kaso.

Matud niya nga ila nang gipahibalo ang mga manager sa lima ka pawnshop sa Argao ingon man ang mga kasikbit nga lungsod kon dunay maprenda o ba kaha ibaligya nga kuwentas, kinahanglan pahibaw-on dayon sila aron mausi kung iya ba kini sa patron sa nagbaligya.

Dugang pang Nacaytuna ang iyang mga kauban ug ang usa ka saksi ang gakuyog sa pagpanglakaw sa pamasin nga makit-an ang kawatan nga mikuha sa kuwintas.

Sa miaging adlaw ang nag-inusarang kawatan mikawat sa kuwintas sa imahen ni Sr. San Miguel ang patron sa Argao, human gibuak ang bildo dihang gihapak og tipaka sa semento diin gibutang gawas sa simbahan ang rebolto sa maong santos.

Ang kuwintas nga bulawan gipanag-iya ni Msgr. Jose Montecillo kinsa maoy kura paroko sa maong lungsod.

Gibana-banang mokabat og P40 mil ang kantidad sa bulawan.

Atol sa hitabo, usa ka tawo ang nag jogging duol sa simbahan nga igo lang milabay, apan nakadungog nga nipiti ang urna sa bildo ni Sr. San Miguel.

Nakita nalang sa maong tawo nga mikaratil og dagan ang wala mailhing kawatan paingon sa nagparking nga bisiklita og misutoy og panagan palayo sa maong dapit.

Nagduda ang maong tawo hinungdan nga daling miadto sa kumbento ug mitaho sa iyang nakita.