Ang gidakop sa grupo nila ni Inspector Michael Anthony Bastes giilang si Franklin Catostos, giingong fixer sa Land Transportation and Franchising Regulatory Board sa Mandaue.
Una nang mireklamo ang biktimang si Henry Zanoria, kinsa nakabayad na og P90,000 ngadto sa suspek pinaagi sa data-data sukad pa niadtong Hunyo.
Matud pa ni Bastes, ang biktima gipasaligan sa suspek nga mahatagan og franchise ang tulo niini ka mga sakyanan apan diha na lang siya nahibulong dihang imbes nga orihinal nga kopya sa prangkisa ang ihatag kaniya xerox copy lang kini.
Tungod niini gisusi ni Zanoria ang LTFRB-Mandaue aron pagtino kun orihinal ba kini ug diha na lang niya natino nga peke kini hinungdan nga mitug-an ang biktima sa TRS.
Nianang tungora gipangayo pag-usab sa biktima ang orihinal nga kopya sa prangkisa apan gikatahong nagmagahi kini ug midemanda pa og laing P3,000, tungod niini nakigsabot ang biktima sa TRS nga ipahigayon ang entrapment operation.
Niadtong Huwebes sa udto, gamit ang P3 mil nga may ultraviolet nga pulbos gisabutan dayon ang binayranay ni Zanoria ug Catostos diha sa usa ka kan-anan sa Mabolo.
Apan ikmat kaayo ang suspek ug giusab dayon ang dapit diin sila mag-abot ug diha na lang gihimo ang transaksyon sa dalan AC Cortez sa dakbayan sa Mandaue.
Ang mga sakop sa TRS misunod na lang sa maong dapit diin nahitabo ang pagbayad, human matunol sa biktima ang bayad dali niya kining giaresto uban usab sa mga sakop sa TRS.
Sukad niadtong Biyernes hangtud niadtong Sabado, nag-abot-abot ang mga reklamante batok ni Catostos nga giilang sila si Judith Ogabang nga taga dalan B.Rodriguez ning dakbayan kinsa nakabayad na og P37,000 sa suspek aron paghikay sa prangkisa sa iyang PUJ.
Laing biktimang mitumaw mao sila si Danny Jemino ug Rother Malolot.
Si Malolot mipahikay sa prangkisa sa iyang taxi kang Catostos ug nakabayad na usab og P50,000 ug usa ka cellular phone apan hangtud karon walay papeles nga napakita ang suspek.
Samtang si Jemino wala na makapamasahero sa gisaligang usa ka PUJ human usab mailad ni Catostos ug gipabayad kini og P32,000.
"Luoy ni si Jemino kay nagsalig sa iyang multicab unya usa ka tuig na kuno wala pa gyud siya makapamasahero, mao ra bay iyang gisaligan pagpaeskwela sa iyang mga anak," asoy pang Bastes.
Nagsapaw-sapaw nga kaso sa pagpangilad ang gikatakdang ipasaka sa TRS batok kang Catostos karong adlawa.